गोंदिया : विवाहबाह्य अनैतिक संबंध टिकविण्यासाठी पतीचा खून केल्याप्रकरणी येथील प्रमुख जिल्हा व सत्र न्यायालयाने गुरुवारी (ता. ३) दिलेल्या निकालात आरोपी पत्नीला जन्मठेपेसह सश्रम कारावास व ५ हजार रुपये दंडाची शिक्षा ठोठावली आहे.

तिच्या संशयित आरोपी प्रियकराला पुराव्याअभावी निर्दोष मुक्त करण्यात आले आहे. शारदा मुनेश्वर पारधी (वय २८, रा. बाघोली, ता. तिरोडा) असे शिक्षा ठोठावण्यात आलेल्या आरोपीचे नाव आहे.बाघोली येथील मुनेश्वर सहेसराम पारधी याची पत्नी आरोपी शारदा पारधी हिचे गावातीलच आरोपी कुणाल मनोहर पटले याचेशी विवाहबाह्य अनैतिक संबंध होते. या संबंधात पती मुनेश्वर अडसर ठरत असल्यामुळे त्याचा कायमचा काटा काढण्यासाठी पत्नी शारदा व तिचा प्रियकर कुणाल या दोघांनी संगनमत करून कट रचला.

दरम्यान, २१ नोव्हेंबर २०२१ रोजी पहाटे ३.३० च्या सुमारास मुनेश्वर झोपेत असताना त्याच्या डोक्यावर व शरीरावर कुऱ्हाडीने वार करून त्याचा खून केला. यावेळी आरोपी शारदाने मृत मुनेश्वरची मावशी सायत्राबाई बाबुलाल बघेले व मावसभाऊ प्रदीप बाबुलाल बघेले यांना फोनद्वारे मुनेश्वरची प्रकृती बरोबर नसल्याचे सांगितले.

मात्र, शरीरावर घाव पाहून व आरोपी शारदाच्या विवाहबाह्य संबंधांविषयी सायत्राबाईला कल्पना असल्याने तिने व तिच्या मुलाने २१ नोव्हेंबर २०२१ रोजी दवनीवाडा पोलिस ठाण्यात तक्रार दाखल केली होती. यावेळी तत्कालीन तपासी अधिकारी पोलिस निरीक्षक प्रताप भोसले यांनी सविस्तर तपास करून दोन्ही आरोपींविरूद्ध गुन्हा नोंद करीत अटक केली होती. दोन्ही आरोपींच्या विरोधात जिल्हा व सत्र न्यायालयात दोषारोपपत्र सादर केले होते.

या प्रकरणात आरोपींविरूद्ध दोष सिद्ध करण्यासाठी सरकार पक्षातर्फे अतिरिक्त सरकारी वकील कृष्णा डी. पारधी यांनी एकूण १४ साक्षदारांची साक्ष नोंदवत इतर कागदोपत्री दस्तऐवज न्यायालयासामोर सादर केले. एकंदरीत आरोपीचे वकील व सरकारी वकील यांच्या सविस्तर युक्तीवादानंतर प्रमुख जिल्हा व सत्र न्यायाधीश ए. टी. वानखेडे यांनी आरोपीविरूद्ध सरकारी पक्षाचा पुरावा ग्राह्य धरून आरोपी शारदा मुनेश्वर पारधी हिला जन्मठेपेच्या सश्रम कारावासाची शिक्षा व ५ हजार रुपये दंड व दंड न भरल्यास ४ महिन्याचा अतिरिक्त कारावासाची शिक्षा ठोठावली. तर आरोपी कुणाल पटले याला पुराव्यांअभावी निर्दोष मुक्तता केली आहे.