अर्जुनी मोरगाव (जि. गोंदिया) : गेल्या दोन-तीन वर्षांपासून या मार्गाची दयनीय अवस्था झाली आहे. जागोजागी रस्ता उखडलेला असून गिट्टी बाहेर आली आहे. मार्गाच्या दुरुस्तीसाठी 18 डिसेंबर 2018 ला राष्ट्रवादी कॉंग्रेसच्या वतीने या राज्यमार्गावर झाडे लावून तसेच टायर जाळून आंदोलन करण्यात आले होते.

त्याचा धसका घेत सार्वजनिक बांधकाम विभागाने काही ठिकाणी गिट्टी टाकून व मुरमाचा लेप देऊन या रस्त्याची डागडुजी केली. मात्र काम न झाल्याने या रस्त्याची दैन्यावस्था झाली आहे.

रस्त्यावर फूट-दीड फूट खोल खड्डे

या रस्त्यावर फूट-दीड फूट खोल खड्डे पडले असून अनेकदा अपघातसुद्धा घडले आहेत. गोंदिया-गोरेगाव, नवेगावबांध-अर्जुनी मोरगाव यादरम्यान काही ठिकाणी या रस्त्याची कामे झाली; तर काही ठिकाणी रस्ता बांधकाम बाकी आहे. काही ठिकाणी सीडी वर्क बांधकाम करण्यात आले. हे बांधकाम करताना रस्ता खोदण्यात आला; त्याचीसुद्धा गिट्टी बाहेर निघालेली आहे. त्यामुळे प्रवाशांना त्रास होत आहे.

काम कासवगतीने सुरू

सिडी वर्कचे काम झाल्याने आतातरी रस्त्याचे पूर्णकाम होईल, अशी आशा होती. मात्र, अनेक दिवसांपासून काम कासवगतीने सुरू होते व आता तर ते पूर्ण बंद आहे. त्यामुळे या वर्षीच्या पावसाळ्यातसुद्धा फुटलेल्या रस्त्यावरूनच जनतेला ये-जा करावी लागणार आहे.

जाणून घ्या : या जिल्ह्यातही केला कोरोनाने शिरकाव; महिला रुग्ण आढळली पॉझिटिव्ह

पुढच्या वर्षीपर्यंत रस्ता बांधकाम पूर्ण
यावर्षी या रस्त्याचे पूर्ण बांधकाम होणे मुश्‍कील आहे. तरीही आम्ही प्रयत्न करीत आहोत. पुढच्या वर्षीपर्यंत रस्ता बांधकाम पूर्ण करून देण्याचा अवधी आहे.
- विजय सोनुने, कार्यकारी अभियंता, सार्वजनिक बांधकाम विभाग, अर्जुनी मोरगाव.