तिवसा (जि. अमरावती) : हवामान खात्याने विदर्भात अवकाळी पावसाचा अंदाज व्यक्त केला होता. त्यानुसार विदर्भात आलेल्या सलग दोन दिवसांच्या अवकाळी पाऊस व गारपीटने शेतकऱ्यांचे मोठे नुकसान झाले आहे. अमरावती जिल्ह्यातील शेतकऱ्यांच्या हातातोंडाशी आलेला गहू, कांदा पिकांची पार दाणादाण उडाली आहे. तोंडचा घास पुन्हा निसर्गाने हिरावून नेल्याने बळीराजा पुन्हा संकटात सापडला आहे.

१८ मार्चला अमरावती जिल्ह्यातील दर्यापूर, मेळघाट परिसरात तुफान गारपीट झाल्यानंतर शुक्रवारी सायंकाळी रात्रीच्या वेळी पुन्हा एकदा वादळी पाऊस व गारपीट झाली. मुसळधार पावसामुळे सोंगणीला आलेला गहू व सोंगणी करून ठेवलेला हरभरा पार पावसात भिजला. त्यामुळे अमरावती जिल्ह्यातील नऊ तालुक्याला वादळी पावसाचा तडाखा बसला आहे.

अधिक माहितीसाठी - घटस्फोटीत महिला झाली तीन महिन्यांची गर्भवती; प्रियकराचं सत्य समोर येताच उचललं कठोर पाऊल

या नऊ तालुक्यांत मोठ्या प्रमाणावर अवकाळी पावसाने शेती पिकांचे मोठे नुकसान केले आहे. उन्हाळ्यामध्ये घेतला जाणारा कांदा पिकासह संत्राचे देखील नुकसान झाले आहे. पुढे आणखी काही दिवस विदर्भात पावसाची शक्यता वर्तविण्यात आल्याने शेतकऱ्यांच्या चिंतेत पुन्हा एकदा भर पडली आहे. अमरावती जिल्ह्यातील शेतकऱ्यांच्या हातातोंडाशी आलेला गहू, कांदा पिकांची पार दाणादाण उडाली आहे. तोंडचा घास पुन्हा निसर्गाने हिरावून नेल्याने बळीराजा पुन्हा संकटात सापडला आहे.

कांद्याला अवकाळी पाऊस व गारपिटीने झोडपले
तिवसा तालुक्यातील भारसवाडी येथील गजानन जोरे या कांदा उत्पादक शेतकऱ्यांने आपल्या दोन एकर शेतात कांद्याची लागवड केली होती. यात त्यांनी सत्तर हजार रुपयांचा खर्च केला. मात्र, आता काढणीला आलेला कांद्याला अवकाळी पाऊस व गारपिटीने झोडपून टाकले. कांद्याला गाराचा मार लागल्याने सडला आहे. त्यामुळे त्यांना दोन ते अडीच लाखांचे होणारे उत्पन्न बुडाले आहे. त्यांचे आता लागवडीचे सत्तर हजार रुपये सुद्धा निघणार नाही. त्यामुळे त्यांच्यावर मोठे नैसर्गिक संकट उभे ठाकले आहे.
- गजानन जोरे,
कांदा उत्पादक शेतकरी