अमरावती : एकतर्फी प्रेमात कशाचेच बंधन नसते. तो तिच्या भेटीसाठी एवढा आतुर झाला की, त्याचा मोबाईल क्रमांक युवतीने ब्लॉक केल्यानंतर तो वेगवेगळ्या फोनवरून तिच्याशी संपर्क साधत होता. अखेर तो बुलढाण्यावरून अमरावतीत आला. अन्‌ तिला भेटण्याऐवजी पोलिसांना भेटला.
शहरातील एका अभ्यासिकेत दोन मैत्रिणी स्पर्धा परीक्षेची तयारी करीत होत्या. त्यापैकी एक अमरावतीची तर, दुसरी अन्य जिल्ह्यात राहणारी होती. लॉकडाउन सुरू झाल्यानंतर ती मैत्रीण आपल्या गावी निघून गेली. मैत्रिणीने संपर्कासाठी नात्यातील युवकाचा मोबाईल क्रमांक अमरावतीच्या मैत्रिणीला दिला. ज्यावेळी युवती संपर्क साधायची तेव्हा एक युवक त्यावरून बोलत होता. अशा पद्धतीने युवतीचा मोबाईल क्रमांक त्याच्या हाती लागला.
17 वर्षांचा अल्पवयीन युवक त्यानंतर वेगवेगळ्या मोबाईल क्रमांकावरून अमरावतीच्या युवतीसोबत संपर्क साधून तिच्यापुढे भेटीचा प्रस्ताव ठेवत होता. बघायचे आहे. घराबाहेर ये... असे अनेक निरोप देऊन युवतीचे मन वळविण्याचा त्याने प्रयत्न केला. युवतीने त्या अल्पवयीन मुलास पोलिसांत तक्रार करण्याचा इशारा दिला. त्यालाही तो घाबरला नाही. जर, बोलली नाहीस तर आत्महत्या करण्याचीही त्याने धमकी दिली.
सततच्या त्रासाला कंटाळलेल्या युवतीने अखेर त्याचा मोबाईल क्रमांक ब्लॉक केला. त्यानंतरही त्याने पिच्छा सोडला नाही. नकार दिल्यानंतर तो अमरावतीच्या युवतीशी वेगवेगळ्या क्रमांकावरून संपर्क साधत होता. भेटीसाठी आतूर तो अल्पवयीन बुलडाणा जिल्ह्यातून शुक्रवारी (ता. 19) अमरावतीत आला. त्याने पुन्हा एका अनोळखी मोबाईल क्रमांकावरून युवतीशी संपर्क साधला, त्याने तिला अंधविद्यालय, गजानननगर येथे भेटीसाठी बोलविले.
अखेर पाणी डोक्‍यावरून जात असल्याचे बघून युवतीने वडिलांना घटनेची माहिती दिली. वडिलांनी अल्पवयीन मुलाची समजूत काढण्याचा प्रयत्न केला. मात्र, मुलीच्या पित्यालाही त्याने जुमानले नाही. युवतीने अखेर वडिलांसह फ्रेजरपुरा ठाणे गाठून तक्रार केली. पोलिसांनी अल्पवयीनाविरुद्ध विनयभंगाचा गुन्हा दाखल केला, त्याला ताब्यात घेऊन सुधारगृहात त्याची रवानगी केली.
नियमानुसार आवश्‍यक कारवाई
प्रकरण नाजूक असल्याने चौकशी करताना, अल्पवयीनाचे समुपदेशनही केले. नियमानुसार आवश्‍यक कारवाई केली.
तू बोलली नाहीस तर आत्महत्या करीन, अल्पवयीन द्यायचा सतत धमकी, पुढे घडला हा प्रकार
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.