वरुड (जि. अमरावती)  : तालुक्‍यातील वरुड- पांढुर्णा राष्ट्रीय महामार्गावरील आरटीओ चेकपोस्टपासून काही अंतरावर वरुडकडून पांढुर्ण्याकडे जात असलेली कार व दुचाकीची धडक झाली. रविवारी (ता. 21) दुपारी झालेल्या या अपघातात दुचाकीचालकाचा घटनास्थळीच मृत्यू झाला. 

मूळचे मध्य प्रदेशातील इंदूर येथील रहिवासी असलेले मनोज जैन हे एमपी 09 सीव्ही 8140 क्रमांकाच्या टाटा इंडिका कारने परिवारासह पुणे वाघोली येथून सासूरवाडी असलेल्या मध्य प्रदेशातील छिंदवाडा येथे जात होते. मात्र, वरुड-पांढुर्णा राष्ट्रीय महामार्गावरील आरटीओ चेकपोस्टपासून काही अंतरावर एमएच- 27 एजे 1082 क्रमांकाच्या दुचाकीवर लक्ष्मण नामदेव कुमरे (वय 45, रा. देशमुख अंबाडा, ता. नरखेड, जि. नागपूर)हे चुकीच्या दिशेने भरधाव येत होते. त्यांची भरधाव दुचाकी थेट कारवर धडकली. या धडकेत दुचाकी चालक लक्ष्मण कुमरे यांचा घटनास्थळीच मृत्यू झाला. 

अवश्य वाचा- `फादर्स डे`ला मुलाने वडिलांना दिली अनोखी भेट; असे पूर्ण केले स्वप्न

दैव बलवत्तर होते म्हणून कारमधील सुरक्षा फुगे त्वरित उघडले आणि मनोज राजकुमार जैन (वय 38), पत्नी रोमा मनोज जैन (वय 32), पुलकी जैन (वय आठ) व रेहांश जैन (वय पाच) सुखरूप बचावले. घटनेची माहिती मिळताच शेंदूरजनाघाटचे ठाणेदार श्रीराम गेडाम, पोलिस उपनिरीक्षक सचिन कानडे, सहायक पोलिस उपनिरीक्षक विजय लेव्हरकर, पोलिस कर्मचारी पंकज गावंडे, रत्नदीप वानखडे, संजय उदापुरे, शैलेश घुरडे, सुरेश कांबळे, विलास कोहळे, नरेश घुगे यांनी घटनास्थळ गाठून पंचनामा केला व मृत लक्ष्मण कुमरेचा मृतदेह उत्तरीय तासणीकरिता ग्रामीण रुग्णालयात पाठविला आला.