सिरसोली (ता. तेल्हारा): रविवारी दुपारी दोन वाजता काळेगाव येथे खेळत असताना मामाच्या घरी आलेल्या दोन चिमुकलींचा दुर्दैवी मृत्यू झाला. कुलरचा शॉक लागल्याने या घटनेने काळेगाव सह बेलुरा व खैरखेड या गावांमध्ये शोककळा पसरली आहे.

घटना कशी घडली?

बेलुरा (ता. अकोट) येथील कु. माऊली उर्फ ईशानी प्रवीण ढोले, वय पाच वर्ष, ही काळेगाव येथील रवी रामकृष्ण चिकटे या मामाच्या घरी आली होती. तसेच खैरखेड येथील कु. माऊली उर्फ प्रियांशी सोपान मेतकर, वय पाच वर्ष, ही देखील काळेगाव येथील धीरज चौखंडे या मामाच्या घरी आली होती. दोघींच्याही आई ह्या मैत्रिणी असल्याने त्या दोघी एकत्र खेळत असताना रामकृष्ण चिकटे यांच्या घरातील कुलरचा शॉक लागल्याने जागेवरच मृत्यू झाला.

गावांमध्ये शोककळा-

या हृदयद्रावक घटनेने बेलुरा, काळेगाव व खैरखेड या गावांमध्ये शोककळा पसरली आहे. मृत्यूनंतर दोघींचाही आपापल्या गावी अंत्यविधी करण्यात आला. या दुर्दैवी घटनेमुळे सर्वत्र हळहळ व्यक्त करण्यात येत आहे. (akola news)

या प्रकारामुळे सर्वत्र शोककळा पसरली आहे आणि या चिमुकल्यांच्या परिवारावर दुःखाचा डोंगर कोसळला आहे. या घटनाक्रमामुळे गावकरी हादरले आहेत व अशा प्रकारच्या अपघातांपासून सावध राहण्याची गरज अधोरेखित झाली आहे.