यवतमाळ : शहरातील जामनकर नगरातील आठवडी बाजारात आपले हार्डवेअरचे दुकान लावलेल्या एका व्यापाऱ्याच्या दुकानातील सामानांची स्थानिक गुंडांनी नासधूसकेली. घेतलेल्या सामानांचे पैसे मागितले असता शिवीगाळ करून जीवे मारण्याची धमकी दिली. एवढ्यावरच ते थांबले नाही तर, "ये एरिया में दुकान लगाना है तो पांचसों रुपये हप्ता देना पडेगा', अशी ताकीद दिली. ही घटना रविवारी (ता.23) सायंकाळी सात वाजताच्या सुमारास घडली. या प्रकरणी अवधूतवाडी पोलिस ठाण्यात सात जणांविरुद्ध गुन्हा नोंदविण्यात आला आहे. 

शिवीगाळ करून जिवे मारण्याची धमकी

यवतमाळ शहरातील इंदिरानगर भागात राहणाऱ्या मो. रफीक मो. शफीक यांचा हार्डवेअरचा व्यवसाय आहे. दर रविवारी जामनकर नगरातील आठवडी बाजारात ते आपले दुकान लावतात. या रविवारीसुद्धा नेहमीप्रमाणे त्यांनी बाजारात आपले दुकान लावले होते. सायंकाळनंतर दुकानातील सामानांची आवराआवर करून दुकान बंद करीत असताना जामनकर नगरात गुंडांचे टोळके आले. या टोळक्‍यातील संशयित सचिन राठोड याने मो. रफीक मो. शफीक यांच्या दुकानातील पाना-पेचकस उचलला आणि त्यांच्याकडे रागाने बघू लागला. सामान घ्यायचे आहे काय, असे मो. रफीक मो. शफीक यांनी त्याला विचारले असता तो सामान घेऊन निघून जाऊ लागला. मो. रफीक मो. शफीक यांनी सामानाचे पैसे मागताच सचिन राठोड याने शिवीगाळ करीत जिवे मारण्याची धमकी दिली. 

अवश्य वाचा- खाकी वर्दीतले देवदूत...मुलीला दिले जीवदान

सात जणांविरुद्ध गुन्हा दाखल

"इधर हमसे पुछे बगैर दुकान लगाने का नही'. दुकान लावायचे असेल तर पाचशे रुपये हप्ता द्यावा लागेल, अशी धमकी दिली. तसेच टोळक्‍यातील इतरांनी दुकानातील सामानांची नासधूस करून दहा हजार रुपयांचे नुकसान केले. त्याचप्रमाणे इतरांच्याही दुकानाची नासधूस केली. मो. रफीक यांनी गुरुवारी (ता.27) अवधूतवाडी पोलिस ठाणे गाठून झालेल्या घटनेची तक्रार दिली. त्यावरून सचिन राठोड (वय 30), सलमान बिहारी (वय 26), शाहरुख देडी (वय 27, सर्व रा. जामनकर नगर) यांच्यासह अन्य सात जणांविरुद्ध गुन्हा नोंदविला.