गोरेगाव (जि. गोंदिया) : कोरोना विषाणूचा प्रादुर्भाव वाढण्याची शक्‍यता असल्याने जिल्हाधिकाऱ्यांनी नागरिकांना जीवनावश्‍यक वस्तूंची देवाणघेवाण करता यावी, यासाठी किराणा दुकाने व अन्य दुकानांची वेळ सकाळी 9 ते सायंकाळी 5 वाजेपर्यंत ठरवून दिली आहे. परंतु, ग्रामीण भागात या आदेशाची अंमलबजावणी न करता रात्री उशिरापर्यंत किराणा दुकाने सुरू असतात. याकडे गावात स्थापित गाव समितीचे दुर्लक्ष असल्याचे सांगितले जाते.

साथरोग प्रतिबंधात्मक उपाययोजना म्हणून जिल्हाधिकाऱ्यांनी नियमांचे उल्लंघन करणाऱ्या व्यक्तींवर कारवाई करता यावी, यासाठी आदेश काढले आहेत. ग्रामीण भागात कोरोना विषाणूचा प्रादुर्भाव रोखण्यासाठी गाव समितीची निवड करण्यात आली. या समितीत सरपंच, ग्रामसेवक, पोलिस पाटील, तलाठी, कृषीसेवक, अंगणवाडीसेविका, आरोग्यसेविका, मुख्याध्यापक, शिक्षक यांच्याकडे जबाबदारी सोपवली. शहरी भागात जीवनावश्‍यक वस्तूंची दुकाने सकाळी 9 वाजता उघडतात व सायंकाळी 5 वाजता बंद होतात. परंतु, ग्रामीण भागात याकडे दुर्लक्ष करून नियमित दुकाने सुरू असतात. गावात गाव समिती असली तरी, ही समिती जिल्हाधिकाऱ्यांच्या आदेशाचे पालन करीत नाही. तसेच नाका-तोंडाला मास्क बांधण्यात येत नाही. त्यामुळे गावातील अनेकांना त्रास सहन करावा लागत आहे.

विदर्भाच्या बातम्यांसाठी येथे ► क्लिक करा

आदेशाचे उल्लंघन करणाऱ्यांविरुद्ध कारवाई
आदेशाचे उल्लंघन करणाऱ्यांविरुद्ध कारवाई करण्यात आली. गावात गाव समिती तयार करण्यात आली. या समितीचे अध्यक्ष, सचिव व सदस्यांनी आदेशाचे पालन करून कारवाईकरिता माहिती द्यावी.
पी. एन. वाघचौरे, प्रभारी तहसीलदार, गोरेगाव