अमरावती : नोकरी लावून देण्याचे खोटे आश्‍वासन देऊन चार व्यक्तींनी एका युवकाची फसवणूक केली व त्याच्याकडून जवळपास अकरा लाख रुपये उकळले. फसवणूक झाल्याचे लक्षात आल्यावर युवकाने पोलिस ठाणे गाठले.

नंदूरबार येथे सूक्ष्म व लघुद्योग विभागात नोकरी लावून देण्यासाठी आरोपींनी खोटी मुलाखत घेतली. ऑर्डर काढण्यासाठी वेळोवेळी पैसे घेऊन एकाची तब्बल 11 लाख 35 हजार रुपयांची फसवणूक करण्यात आल्याचा प्रकार उघडकीस आला आहे. याप्रकरणी कोतवाली पोलिसांनी चार जणांविरुद्ध गुन्हा दाखल केला. आशीष सुरेखराव डाहाके (वय 29) हे भातकुली तालुक्‍यतील साहूर येथील रहिवाशी असून ते शेती करतात. त्यांची हितेश तिमांडे (वय 25), अमोल इंगोले (वय 28), सुभाष कावळे (वय 54) तसेच रवी राजमोरे (वय 45) यांच्याशी ओळख झाली. सूक्ष्म व लघुद्योग विभागात नोकरी लावून देतो, असे सांगत त्यांनी आशीषकडे 15 लाखांची मागणी केली.

वाचा - उशिरा का होईना नरखेडकरांना सुचले शहाणपण, काय केले नागरिकांनी?

त्यानुसार आशीषने मार्च 2017 मध्ये 50 हजार तसेच 11 एप्रिल 2017 ला नंदूरबार येथे मुलाखत झाल्यानंतर 50 हजारांची रक्कम सुभाष कावळेच्या खात्यामध्ये ट्रान्सफर केली. यादरम्यान आरोपींच्या सांगण्यावरून आशीषने जयस्तंभ चौक येथे राम विधळे नामक व्यक्तीला दोन लाख रुपये दिले. लगेच ऑर्डर निघणार असून 15 दिवसांत रक्कम जमा करण्यास सांगितल्यानंतर आशीषने सुभाष कावळे याच्या खात्यात 19 एप्रिल 2017 ला तीन लाख 70 हजार, तर 18 मे रोजी तीन लाख रुपयांची रक्कम टाकली. अशाप्रकरे आरोपींकडून 11 लाख 35 हजार रुपये घेण्यात आले, मात्र ऑर्डर दिली नाही. आपली फसवणूक झाल्याचे लक्षात येताच आशीष डाहाके यांनी कोतवाली पोलिस ठाण्यात तक्रार दाखल केली. त्या आधारे पोलिसांनी चार जणांविरोधात गुन्हे दाखल केले.

संपादन - नरेश शेळके