कामठी - येरखेडा गावातील रनाळा-येरखेडा संयुक्त जलशुद्धीकरण केंद्रातून तब्बल पाच ट्रक गाळ काढण्यात आला. पाण्याची टाकी स्वच्छ करण्याचे काम मागील काही दिवसांपासून सुरू आहे. अनेक वर्षांपासून टाकीची स्वच्छताच झाली नसल्याने नळातून गढूळ पाणी येत असल्याची नागरिकांची तक्रार होती. तसेच ग्रामस्थांमध्ये विविध साथरोग बळावत असल्याने तातडीने टाकीची स्वच्छता करण्यात आली.

नळातून दूषित पाणी येत असल्याची तक्रार रनाळा-येरखेडा गावच्या सरपंच सरिता रंगारी यांच्याकडे येत होत्या. त्याची दखल घेऊन रंगारी यांनी स्वत: जलशुद्धीकरण केंद्रात जाऊन पाहणी केली. टाकीची अवस्था पाहून त्यांनी तातडीने स्वच्छतेचे काम सुरू केले. मजुरांनी चार दिवस राबविलेल्या स्वच्छता मोहिमेत टाकीतून तब्बल पाच ट्रक गाळ आणि कचरा काढला. स्वच्छतेनंतर जलशुद्धीकरण केंद्राची माजी जिल्हा परिषद अध्यक्ष सुरेश भोयर, पंचायत समिती सदस्य सुमेध रंगारी यांनी पाहणी केली. नळाला गढूळ पाणी येत असून मुलांना पोटदुखीचा त्रास होत असल्याच्या अनेक तक्रारी सरपंचांकडे येत होत्या. टाकीत मोठ्या प्रमाणात गाळ व माती साचली असल्याचे त्यांच्या लक्षात आल्याने नागरिकांच्या आरोग्याशी निगडित समस्या सरपंच रंगारी यांनी तातडीने सोडवली. रनाळा, येरखेडावासीयांना आता शुद्ध पाणी मिळेल, अशी अपेक्षा त्यांनी व्यक्त केली.

चार-पाच दिवस युद्धस्तरावर टाकी स्वच्छतेचे काम करण्यात आले. यापूर्वी ग्रामपंचायतीत सत्तेत असलेल्यांच्या दुर्लक्षित वृत्तीचा फटका नागरिकांना बसला. गढूळ पाण्याबाबत नागरिकांच्या तक्रारी वाढल्याने टाकीची पाहणी करून स्वच्छतेचे आदेश दिले. नागरिकांना आरोग्यदायी जीवन देणे, हेच प्रथम कर्तव्य मानते.

- सरिता रंगारी, सरपंच, रनाळा-येरखेडा