चंद्रपूर : दुर्गापूरमधील समतानगर परिसरात बुधवारी रात्री नऊ वाजताच्या सुमारास बिबट्याने आठ वर्षीय मुलाला उचलून नेल्याची धक्कादायक घटना घडली आहे. प्रतीक शेषराव बावणे (वय ८) असे मुलाचे नाव आहे. आतापर्यंत तीन ते चार मुलांवर बिबट्याने हल्ला केला आहे. मागे एका नरभक्ष बिबट्याला जेरबंद केले होते.

बावणे कुटुंबीय बेलोरा तालुका भद्रावती येथील रहिवासी आहेत. मुलाच्या आईच्या वडिलांचा बुधवारी सकाळीच मृत्यू झाला. त्यामुळे सर्व कुटुंब तेजराम मेश्राम यांचा मृत्यू झाल्याने दुर्गापूर येथे आले होते. मेश्राम यांचे पार्थिव घरीच असल्याने सर्व जण घराच्या समोर बसून होते. तर प्रतीक हा घराच्या मागे खेळत होता.

तितक्यात बिबट्याने मुलाला फरफटत जंगलात नेले. प्रत्यक्षदर्शीनी आरडाओरडा केल्याने बिबट्याने धूम ठोकली. मात्र, बालकाचे बिबट्याने लचके तोडले होते. बालकांचे वेगवेगळ्या ठिकाणी अवयव वनविभागाच्या कर्मचाऱ्यांना मिळाल्याची माहिती आहे.