घुग्घुस (जि. चंद्रपूर) : लॉकङाऊनमध्ये जिल्ह्याच्या सीमाबंद केल्या आहेत. दुसऱ्या राज्यातील आणि जिल्ह्यातील माणसांना प्रवेशबंदी आहे.  दारूसाठी मात्र मोकळे रान आहे. यवतमाळ जिल्ह्यातून घुग्घुसमार्गे मोठ्या प्रमाणात चंद्रपूर जिल्ह्यात दारू येत आहे.
लॉकडाऊनमध्ये जीवनावश्‍यक वस्तू आणण्याची परवानगी मिळाली आहे. त्यांच्यासाठी जिल्हाबंदीची अट शिथील आहे. याचाच फायदा दारूतस्कर घेत आहेत. जीवनावश्‍यक वस्तू आणण्यासाठी वाहनांना "पास" दिले आहेत. या जिल्ह्यात येणाऱ्या दुधाच्या कॅनमधून दारू आणली जात असल्याची खात्रीलायक माहिती आहे. यवतमाळ जिल्ह्यात कोरोनाचे रुग्ण सापडले आहेत. तो जिल्हा रेडझोनमध्ये आहे. चंद्रपूर "ग्रीन झोन'मध्ये येतो. या जिल्ह्यात दारूबंदी आहे. यवतमाळात लॉकडाऊनमुळे दारूच्या दुकानांना टाळे लागले आहे. त्याउपरही रात्रीच्या सुमाराला दुकान उघडून जिल्ह्यात दारू पाठविली जात आहे. जीवनावश्‍यक वस्तूंची वाहने रात्रीच शहरात दाखल होतात. यवतमाळच्या सीमेजवळ बेलोरा पूल, सिरपूर आणि घुग्घुस येथे पोलिस चौकी आहे. एकदिवसा आड दोन्ही जिल्ह्यांचे पोलिस आपापल्या चौकीत तैनात असतात. या दरम्यान तस्करांसाठी अनुकूल पोलिस अधिकारी तैनात झाले की दारू पोचती केली जाते, अशी माहिती आहे. जिल्ह्याची सीमा ओलांडून आलेल्या माणसांना पकडून पोलिस कारवाई करतात. त्याचे विलगीकरण करतात. मात्र, माणसांना जिल्ह्यात प्रवेशबंदी असताना दारू मात्र खुलेआम पोहोचत आहे. यवतमाळ जिल्ह्यात कोरोनाचे रुग्ण आहे. त्यामुळे अशा पद्धतीच्या दारूतस्करीचे या जिल्ह्यातही कोरानाचे संक्रमण होऊ शकते, अशी भीती व्यक्त केली जात आहे.

सविस्तर वाचा - अशी वेळ कोणावरही येऊ नये...कोरोनाबाधितावर अंत्यसंस्कार करणा-या कर्मचा-याच्या भावना
तिप्पट किंमतीत विक्री
चंद्रपूर जिल्ह्यात पाच वर्षांपासून दारूबंदी आहे. लगतच्या जिल्ह्यातील दारू या जिल्ह्यात आतापर्यंत दुप्पट किमतीने विकली जायची. आता यवतमाळ आणि दारू सुरू असलेल्या लगतच्या जिल्ह्यातील दारू दुकान लॉकडाऊनमुळे बंद आहे. दारूचा तुटवडा आहे. मात्र, तरीही मोठ्याप्रमाणात दारू येत आहे. ती तिप्पट किंमतीने विकली जात आहे.