पोंभुर्णा - विवाहित असतानाही प्रेमसंबंधात असलेल्या प्रेमीयुगलाचे मृतदेह शेतशिवारात आढळल्याने एकच खळबळ उडाली आहे. ही घटना सोमवार (ता. २७) सायंकाळी सात वाजताच्या सात सुमारात उघडकीला आली. रूपेश मधुकर मिलमिले (वय ३२, रा. चिंतलधाबा ) आणि शशिकला खुशाब कुसराम (वय २७ रा. भटारी) अशी मृतकांची नावे आहेत.

भटारी येथील शशिकला कुसराम आपल्या नवऱ्यापासून विभक्त राहत होती. रूपेशने दीड वर्षांपूर्वी पत्नीला घटस्फोट दिला होता. रूपेश भाजीपाला विक्रीसाठी भटारी येथे जात होता. यादरम्यान त्यांचे सूत जुळले. मागील दीड वर्षांपासून त्यांच्यात प्रेमसंबंध होते.

सोमवारला दुपारी शशिकला आणि रूपेश गणेश मिलमिले यांच्या शेतशिवाराकडे गेले. त्याच शेतातील विहिरीत रूपेशचा मृतदेह आढळला. शशिकला विहिरीच्या बाजूला मृतावस्थेत आढळली. या घटनेची माहिती मिळताच पोंभूर्णा पोलिस घटनास्थळी दाखल झाले. दोघांचेही मृतदेह शवविच्छेदनासाठी पोंभुर्णा ग्रामीण रुग्णालयात आणण्यात आले.

मात्र, २८ मे रोजी वरिष्ठांच्या आदेशानुसार पोलिसांना आपला निर्णय फिरविला आणि चंद्रपुरातील जिल्हा सामान्य रुग्णालयात मृतहेद शवविच्छेदनासाठी हलविण्यात आले. दुपारी तीन वाजताच्या सुमाराला त्यांचे शवविच्छेदन झाले. सकृतदर्शनी ही आत्महत्या वाटली.

मात्र, पोलिस तपासात आणखी काही धागेदोरे हाती लागले. ही हत्या असू शकते, असा पोलिसांना संशय आला. त्यामुळे चंद्रपूरला मृतदेह शवविच्छेदनासाठी पाठविण्यात आले. दोघांचे शव हे संशयास्पद स्थितीत आढळून आले. त्यांच्या मृत्यूचे नेमके कारण आता शवविच्छेदन अहवालातून समोर येईल.