अमरावती : दोघेही शहरात राहत असल्यामुळे त्यांची ओळख झाली. त्याने तिला बोलावून डोसा खायला दिला. ती बेशुद्ध झाली. ज्यावेळी शुद्ध आली तेव्हा आळंदी येथील एका धर्मशाळेत तिचे लग्न होतानाच तिला दिसले.

पीडितेच्या तक्रारीवरून गाडगेनगर पोलिसांनी मंगळवारी विनय शामलाल लुल्ला (वय २५) विरुद्ध अपहरण व अत्याचाराचा गुन्हा दाखल केला. तो एका कापड दुकानात नोकरी करीत होता. असे पोलिस निरीक्षक मनीष ठाकरे यांनी सांगितले. विनयची एका २२ वर्षीय युवतीसोबत ओळख होती. ओळखीनंतर दोघांच्या भेटीगाठी सुरू झाल्या. ३१ ऑक्‍टोबर २०१९ रोजी विनयने युवतीला भेटण्यासाठी वेलकम टी पॉइंटवर बोलविले. तेथे युवती गेली असता, त्याने तिला डोसा खायला दिला.

वाचा - आमदार ठाकरे म्हणतात, आम्ही महाविकास आघाडीचा धर्म पाळत आहोत, म्हणून...

डोसा खाताच चक्कर आल्याने ती बेशुद्ध झाली. ज्यावेळी ती शुद्धीवर आली तेव्हा ती पुणे जिल्ह्यातील आळंदी येथील एका धर्मशाळेत होती. तिच्यासोबत त्याठिकाणी विनयचे लग्न झाले. लग्न झाल्यावर दोघेही चार ते पाच महिने पुण्यात राहिले. त्यानंतर विनय रामलक्ष्मण संकुल अमरावती येथे आला. तेथेही दोघे सोबत राहिले. घरी असताना विनयने शारीरिक संबंध ठेवले, असा आरोप पीडित युवतीने मंगळवारी गाडगेनगर ठाण्यात दाखल तक्रारीत केला. पीडितेला घेऊन अमरावतीत आल्यानंतर विनय काही दिवसांपासून निघून गेला. असेही पीडितेने तक्रारीत म्हटले. त्याआधारे पोलिसांनी विनयविरुद्ध अपहरण अत्याचाराचा गुन्हा दाखल केला, असे अधिकाऱ्यांनी सांगितले.

युवतीच्या तक्रारीची दखल घेऊन तातडीने कारवाई केली. महिला उपनिरीक्षकाकडे या घटनेचा तपास सोपविला आहे. चौकशीसाठी संशयित आरोपी विनयला बोलविल्या जाईल.
- मनीष ठाकरे, पोलिस निरीक्षक, गाडगेनगर ठाणे.

संपादन - नरेश शेळके