यवतमाळ : येथील पोलिस अधीक्षक कार्यालयात बॉक्‍समध्ये ठेवून असलेला चाबींचा गुच्छा चोरी झाल्याची घटना शनिवारी (ता. पाच) सकाळी उघडकीस आली होती. पोलिस उपअधीक्षक माधुरी बाविस्कर यांच्या तक्रारीवरून या प्रकरणी गुन्हा नोंदविण्यात आला होता. पोलिसांनी चालविलेल्या शोध मोहिमेत चाबींचा गुच्छा चोरी करणारा चक्क "मनोरूग्ण' निघाला.

अजिंदर भोसले (वय 35, रा. आजंती बेडा, ह.मु. तलावफैल), असे संशयिताचे नाव आहे. तो वेडसर असल्याने कुठेही फिरत रहायचा. एसपी कार्यालयात शिरून त्याने चाबींचा गुच्छा चोरी केला होता. पोलिस अधीक्षक कार्यालयात स्टेनो कक्ष, रीडर ब्रॅंच, मंथन हॉल, अभ्यागत कक्ष, अर्जशाखा, लेखाशाखा, आस्थापना शाखा, पत्रव्यवहार शाखा, जावक शाखा, सायबर सेल आदी कक्षांच्या चाब्या स्वागतकक्षाच्या जिन्याजवळ असलेल्या बॉक्‍समध्ये संबंधित विभागाचे कर्मचारी लावून ठेवतात. 

अधिक माहितीसाठी - राणे दाम्पत्य आत्महत्या प्रकरणाचे गूढ उकलले : कुत्र्याचे इंजेक्शन देऊन पत्नीने केला पती, मुलांचा खून

शनिवारी सफाई कामगार पांडुरंग गवळी हे कार्यालयाच्या सफाईसाठी आले असता, त्यांना बॉक्‍समध्ये एकही चाबी दिसली नाही. शोधाशोध करूनही चाब्या दिसल्या नाहीत. त्यामुळे पोलिसांची चांगलीच भंबेरी उडाली. पोलिस अधीक्षक डॉ. दिलीप पाटील भुजबळ यांनी चौकशीचे आदेश दिले. त्यावरून एसपी कार्यालयातील कर्मचाऱ्यांचे बयाण नोंदविण्यात आले होते. 

पोलिस उपअधीक्षक बाविस्कर यांनी शहर पोलिस ठाण्यात दिलेल्या तक्रारीनुसार अनोळखी व्यक्तीविरुद्ध गुन्हा नोंदविण्यात आला होता. चाबींचा गुच्छा चमेडीयानगरात फेकून देताना अजींदर काही लोकांना दिसला होता. लहान मुलांनी चाबींचा गुच्छा भंगारात विक्री केल्याचे सांगितले जाते. या घटनेची माहिती मिळताच पोलिसांनी शोध घेत संशयिताला अटक केली. ही कारवाई पोलिस अधीक्षक डॉ. दिलीप पाटील भुजबळ, अपर पोलिस अधीक्षक खंडेराव धरणे यांच्या मार्गदर्शनात शहरचे ठाणेदार धनंजय सायरे यांच्यासह डिबी पथकाने केली.

अधिक वाचा - २४ वर्षांपूर्वी रेल्वेस्थानकावर सापडलेल्या 'वर्षा'चं गृहमंत्री अनिल देशमुख करणार कन्यादान 

पोलिस अधीक्षक कार्यालयातून चाबींचा गुच्छा चोरी करणाऱ्यास अटक करण्यात आली आहे. न्यायालयापुढे त्याला हजर करण्यात आले. न्यायालयाच्या आदेशाने आज त्याची रवानगी नागपूर येथील मनोरूग्णालयात करण्यात आली.
- धनंजय सायरे
ठाणेदार, शहर पोलिस ठाणे, यवतमाळ.

संपदान- अथर्व महांकाळ