अमरावती  : महिनाभरापूर्वी शहरातील कॉंग्रेसनगर परिसरात उपद्रवी माकडाने महिलेच्या पायाचा लचका तोडून तिला गंभीर जखमी केले होते. या घटनेनंतर शुक्रवारी, 17 जुलै रोजी रवीनगरात पुन्हा एका युवकास माकडाने जखमी केले. जखमीला उपचारासाठी रुग्णालयात दाखल करण्यात आले आहे, असे रेस्क्‍यू टिमचे प्रमुख अमोल गावनेर यांनी स्पष्ट केले. 

 अवश्य वाचा-  पाठलाग करणाऱ्याच्या दिशेने तिने भिरकावला दगड आणि.... 

काही दिवसांपासून शहराच्या विविध भागात काळतोंड्या माकडांचा धुमाकूळ सुरू असून, फळझाडे असलेल्या ठिकाणी जंगलातून मानवी वस्तीत येणाऱ्या माकडांचे कळप अधिक प्रमाणात दिसून येतात. रवीनगरात मानवीवस्तीत शिरून माकडांच्या कळपांनी धुमाकूळ घालणे सुरू केले. काही दिवस ही नित्याचीच बाब म्हणून नागरिकांनी दुर्लक्ष केले. परंतु शुक्रवारी, 17 जुलै रोजी एका युवकास जखमी केल्याने नागरिकांनी वनविभागाला या घटनेची माहिती दिली. रेस्क्‍यू टिमचे अमोल गावनेर पथकासह रवीनगरात दाखल झाले. उपद्रवी माकडाला आटोक्‍यात आणण्याचे प्रयत्न या पथकाने सुरू केले. 

अवश्य वाचा- सडकछाप मजनूला तिने घडवली जन्माची अद्दल, वाचा काय झाला प्रकार...

गुरुवारी, 16 जुलै रोजी परतवाडा वनपरिक्षेत्रातील गौरखेडा कुंभी परिसरात एका उपद्रवी माकडावर ट्रॅंग्युलायझर गनचा वापर करून त्याला बेशुद्ध करून पकडले. उपद्रवी माकडाने गावात नागरिकांच्या नाकीनऊ आणल्याने माकडाला पशुवैद्यकीय अधिकाऱ्यांच्या उपस्थितीत अमरावती वनविभागाच्या रेस्क्‍यू टिमने बेशुद्ध करून पकडले. सय्यद सलीम, दिनेश लोखंडे, अमोल गावनेर, मनोज माहुलकर, फिरोज खान, नितीन अहिरराव, सतीश उमक, मनोज ठाकूर, वैभव राऊत हे कर्मचारी पथकासह सहभागी होते.  
 

संपादन - राजेंद्र मारोटकर