यवतमाळ : भारतीय कापूस महामंडळाने खुल्या बाजारातून कापूस खरेदीचा निर्णय घेतला. त्यामुळे सीसीआयकरीता सब एजंट म्हणून खरेदी करणार्‍या महाराष्ट्र राज्य सहकारी कापूस उत्पादक पणन महासंघासमोरील अडचणीत वाढ झाली आहे. मंगळवारी (ता. २६) संचालकांच्या बैठकीत खरेदीसंदर्भात ठराव घेऊन तो शासनाला पाठविण्याचा निर्णय घेण्यात आला आहे. या माध्यमातून हमीभाव केंद्राचा चेंडू राज्य सरकारच्या कोर्टात टोलविण्यात येणार आहे.

संततधार पावसामुळे कापसाची झालेली बोंडसड तर काही भागात गुलाबी बोंडअळीचा प्रादुर्भाव यामुळे कापसाची उत्पादकता कमी होण्याची शक्यता वर्तविली जात आहे. देशाअंतर्गंत प्रक्रिया उद्योगाची गरजही यातून भागणार नसल्याने सध्या कापसाच्या दरात तेजी आली आहे. हमीभाव सहा हजार २५ रूपयांच्या तुलनेत कापसाला सात हजार रूपयांपर्यंतचा दर मिळत आहे.

त्यामुळेच यंदा कापसाची आवक होणार नाही, या शक्यतेमुळे सीसीआयने हमीभाव केंद्र न उघडण्याचा निर्णय घेतला आहे. सीसीआयकरीता सबएजंट म्हणून पणन महासंघ खरेदी करतो. पणन महासंघाच्या खरेदीबाबतही यामुळे अनिश्‍चितता निर्माण झाली आहे. दरम्यान पणन महासंघाच्या संचालक मंडळाची मंगळवारी (ता.२६) मुंबईत बैठक होणार आहे. या बैठकीत यंदाच्या हंगामातील खरेदीवर मंथन होईल. बँक गॅरंटी तसेच शासन निधीची तरतूद झाल्यास हमीभावाने खरेदीचा निर्णय या बैठकीत होणार आहे.

महासंघाच्या संचालक मंडळांची बैठक मंगळवारी (ता.२६) होणार आहे. यावेळी कापूस खरेदीबाबतचा ठराव घेऊन शासनाला पाठविण्याचे प्रस्तावीत आहे. शासन त्यावर काय निर्णय घेते, त्यानंतरच हमीभाव केंद्रांची स्थिती स्पष्ट होईल. सीसीआयने खुल्या बाजारातून खरेदीचा निर्णय घेतला आहे. त्यामुळे पणन महासंघाला खरेदी करावयाची झाल्यास शासन निधी किंवा बँक गॅरंटीशिवाय शक्य होणार नाही.

- अनंत देशमुख, अध्यक्ष, महाराष्ट्र राज्य सहकारी कापूस उत्पादक पणन महासंघ

पणन महासंघ शेतकर्‍यांचे हीत जोपासण्यासाठी स्थापन झाला आहे. किमान हमीभावापेक्षा कमी दर शेतकर्‍यांना मिळू नये म्हणून आमचा प्रयत्न असतो. आज सुदैवाने खासगी बाजारात कापसाला सहा हजार आठशे ते सात हजार दर आहे. दिवाळीपूर्वी हमीभाव केंद्र सुरू करण्याचा आमचा विचार आहे. पणन व सीसीआय मिळून १२४ केंद्र सुरू करण्याचे विचाराधीन आहे. पणन ५० तालुक्यात ५० केंद्र सुरू करेल.

- सुरेश चिंचोळकर, संचालक, पणन महासंघ