अमरावती : आपली आणि बहीणीची इज्जत वाचविण्यासाठी एका अल्पवयीन मुलीने आक्रमक पवित्रा घेतला आणि त्यात एक युवक जखमी झाला. तो युवक जखमी झाला असला तरी आक्रमक पवित्रा घेतल्यानेच त्या मुलीचे इज्जत वाचू शकली.

सध्या जिल्ह्यात विविध ठिकाणी छेडखानीच्या घटना वाढत आहेत. काही ठिकाणी छेडखानी करणाऱ्यांना धडा शिकविल्या जातो. जिल्ह्याच्या ग्रामीण भागात छेडखानीला त्रासलेल्या मुलीने बचावासाठी, भिरकावलेला दगड छेडखानी करणाऱ्याच्या डोक्‍यात बसल्याने तो जखमी झाला. गोपाल सरकटे असे जखमी व्यक्तीचे नाव आहे. 14 वर्षीय मुलगी तिच्या चुलत बहिणीसोबत आजीच्या घराकडे पायदळ जात असताना, शासकीय रुग्णालयाजवळ सरकटे याने दोघींचा पाठलाग केला. दोघी बहिणी जिवाच्या आकांताने धावत पुढे निघाल्या. परंतु पाठलाग करणाऱ्याने त्या अल्पवयीन मुलीला निर्जनस्थळ अडवून, बळजबरीचा प्रयत्न केला. मोठ्या बहिणीची छेडखानी होत असताना, चिमुकली रडत होती. अल्पवयीन मुलीने सरकटेच्या हाताला झटका देऊन स्वत:ची सुटका करून घेतली. परंतु त्याने पुन्हा दोघींचा पाठलाग सुरूच ठेवल्याने स्वत:च्या बचावासाठी पीडितेने (वय 14) एक दगड उचलून पाठलाग करणाऱ्याच्या दिशेने भिरकावला, तो दगड त्याच्या डोक्‍यावर बसून तो जखमी झाला.

वाचा - राजस्थानवरून यशोमती ठाकूर विरोधात भाजपने पेटविले शाब्दिक युद्ध

घरी येऊन पीडितेने पालकांजवळ घटनेची माहिती दिली. पालकांनी अखेर खल्लार ठाणे गाठून तक्रार नोंदवली. त्यावरून सरकटेविरुद्ध विनयभंगासह बाललैंगिक अत्याचार प्रतिबंधक कायद्यान्वये गुन्हा दाखल करण्यात आल्याचे पोलिसांनी सांगितले. दरम्यान, युवतीच्या छेडखानीची दुसरी घटना धारणी परिसरात घडली. संशयित शेख फरीद शेख नजीर (वय 31, रा. कळमखार) याचे लग्न झाले असून, त्याला एक सात वर्षाची मुलगीही आहे. ही बाब त्याने लपवून ठेवली. त्यामुळे युवतीने शेख फरीदला न भेटण्याबाबत बजावले. त्यानंतरही त्याने युवतीला एसएमएस करून तिचे फोटो व्हायरल करण्याची धमकी देऊन अडविले. लग्न करण्याची मागणी केली. पीडितेने नकार देताच, शेख फरीदने बळजबरीचा प्रयत्न केला. पीडितेच्या तक्रारीवरून धारणी ठाण्यात शेख फरीदविरुद्ध विनयभंगासह ऍट्रॉसिटी ऍक्‍ट अन्वये गुन्हा दाखल करण्यात आल्याचे पोलिसांनी सांगितले.  

संपादन - नरेश शेळके