अमरावती : रवीनगर येथील एका व्यापारसंकुलातील दुसऱ्या माळ्यावर शालेय विद्यार्थिनीस भेटण्यासाठी बोलावून हात पकडून ‘मुझे आप पसंत हो’ अशी इच्छा व्यक्त केली. हा प्रकार माहिती पडताच संतप्त नागरिकांनी संशयित व्यक्तीस चोपून पोलिसांच्या स्वाधीन केले. मोहंमद सईद मोहंमद इस्राईल (वय ३३, रा. चपराशीपुरा) असे संशयिताचे नाव आहे. त्याला पोलिसांनी अटक केल्याचे पोलिस निरीक्षक मनीष ठाकरे यांनी सांगितले.

प्राप्त माहितीनुसार, शालेय विद्यार्थिनी ही शिकवणी वर्गाला जाते. संशयित मोहंमद सईद हा काही दिवसांपासून तिचा पाठलाग करीत होता. शनिवारी ती घराकडे जात असताना संशयिताने तिला भेटण्यासाठी इमारतीच्या दुसऱ्या माळ्यावर बोलविले. मुलगी त्याठिकाणी गेली असता संशयिताने तिचा हात पकडून ‘मुझे आप पसंत हो’, असे म्हणून फोन नंबर मागितला.

हा प्रकार परिसरातील काही लोकांनी बघितला. त्यांनी संशयित आरोपीला पकडून समाचार घेतला. घटनेची माहिती राजापेठ पोलिसांना दिली. विद्यार्थिनीने नोंदविलेल्या तक्रारीवरून राजापेठ पोलिसांनी मो. सईद विरुद्ध विनयभंगासह बाललैंगिक अत्याचार प्रतिबंधक कायद्यान्वये गुन्हा दाखल करून त्याला अटक केली.