अंजनगावसुर्जी (जि. अमरावती) : सकाळी दात घासत असणारी व्यक्ती नालीत थुंकल्यामुळे वृद्धाने हटकले. त्यावरून रागाच्या भरात जवळची काठी हिसकून वृद्धावर प्रहार करून खून केला. तुळशीराम दौलत गाडे (वय ७२, रा. निमखेडबाजार) असे मृत व्यक्तीचे नाव आहे.

पोलिसांनी दिलेल्या माहितीनुसार, अंजनगावसुर्जी तालुक्यातील निमखेड गावात मंगळवारी (ता. पाच) सकाळी सात वाजताच्या सुमारास ही घटना घडली. तुळशीराम गाडे हे पहाटे काठी घेऊन फिरण्यासाठी निघाले असता त्यांच्या घरासमोर संशयित संगम सुनील दामले (वय २५) हा दात घासून नालीमध्येच थुंकताना दिसला.

गाडे यांनी संगम यास हटकले. त्यावरून त्यांच्यामध्ये तू-तू, मै-मै झाली. शिवीगाळ करून संगमने गाडे यांच्यासोबत भांडण केले. हातातील काठी हिसकून जबर मारहाण केली. त्यात गंभीर जखमी तुळशीराम गाडे यांना उपचारासाठी ग्रामीण रुग्णालयात दाखल करण्यात आले. उपचारादरम्यान गाडे यांचा मृत्यू झाला.

आरोपीला अटक

संशयित संगम सुनील दामले याने काठीने प्रहार करून सासऱ्यांची हत्या केली, असा आरोप मंदा संतोष गाडे (वय ४०) यांनी अंजनगावसुर्जी ठाण्यात दाखल तक्रारीत केला. प्रकरणी पोलिसांनी संगम दामलेविरुद्ध खुनाचा गुन्हा दाखल करून अटक केली.