भद्रावती (जि. चंद्रपूर) : कोरोना प्रादुर्भावाच्या पार्श्वभूमीवर यावर्षीही शहरातील मंदिरे बंद आहे. परिणामी विदर्भात सुप्रसिद्ध असलेल्या भद्रनाग स्वामी मंदिरात भरणाऱ्या नागपंचमी यात्रेला सतत दुसऱ्या वर्षीही खोडा पडला आहे. यामुळे भाविकांत कमालीची नाराजी पसरली आहे.

भद्रनाग मंदिरात दरवर्षी नागपंचमी तथा महाशिवरात्रीला मोठी यात्रा भरते. नागपंचमीला येथे भरणारी यात्रा ही मोठी असते. या दिवशी विदर्भातील कानाकोपऱ्यातून लाखो भाविक मंदिरात येऊन भद्रनागाचे दर्शन घेतात. मात्र, गेल्या वर्षीपासून शासनाच्या आदेशानुसार मंदिरे कोरोना प्रादुर्भावामुळे बंद पडली आहे. यावर्षी प्रारंभी मंदिरे सुरू होण्याची चिन्हे दिसू लागली होती. त्यामुळे यावर्षी भद्रनागाचे दर्शन घेता येईल, अशी आशा भाविकांना होती. मात्र, शासनाद्वारे मंदिरे सुरू करण्याचा निर्णय घेण्यात न आल्याने भाविक निराश झाले आहेत.

यंदा उद्या शुक्रवारी (ता. १३) नागपंचमीच्या दिवशी पहाटे पावणे सहा वाजता श्रीभद्रनाथ स्वामींचा अभिषेक करून विधिवत पूजन करण्यात येणार आहे. यावेळी योगेश पांडे यांच्यासह भद्रनाग स्वामी विश्वस्त मंडळाचे अन्य पदाधिकारी उपस्थित राहतील. भद्रावती येथील भद्रनाग मंदिर वाकटाककालीन असून बांधकाम संपूर्ण हेमाडपंथी धाटणीचे आहे.

गर्भगृह आणि सभागृह असे या मंदिराचे दोन भाग आहेत. मंदिराच्या आत भद्रनाग स्वामींची मूर्ती विराजमान असून येथे महादेवाचा वास आहे. मंदिराच्या प्रांगणात दगडी पायऱ्यांची विहीर आहे. या विहिरीत भद्रनाग स्वामींचा वास असल्याचा भाविकांचा विश्वास आहे. त्यामुळे या विहिरीचीही पूजा करण्यात येते. मंदिरात वर्षभर भाविकांचा राबता असतो. दर्शनासाठी तथा नवस फेडण्यासाठी विदर्भाच्या कानाकोपऱ्यातून हजारो भाविक मंदिरात येत असतात.