नागपूर - अंगाची लाहीलाही करणाऱ्या उन्हाळ्याच्या दिवसांत भर दुपारी शहरात फिरत असताना पाण्याविना घसा कोरडा होऊन जीव कासावीस होतो. घोटभर पाण्यासाठी प्रचंड तगमग होते. अशावेळी एखाद्याने थंडगार शुद्ध पाणी दिल्यास नक्‍कीच आनंद होईल. नागपूरचा एक ‘वॉटरमॅन’ सध्या अनेकांची तृष्णा भागवून त्यांच्या चेहऱ्यावर आनंद फुलवत आहे. त्याची ही नि:स्वार्थ पाणीसेवा सध्या शहरात चर्चेचा विषय आहे. 

आशीष पंडित हे या ‘वॉटरमॅन’चे नाव असून, ते अयोध्यानगर येथील रहिवासी आहेत. आशीष जवळपास महिनाभरापासून स्वत:च्या पैशाने उन्हातान्हात नागपूरकरांची तहान भागवत आहेत. त्यांची ही जनसेवा सकाळपासून सायंकाळपर्यंत अव्याहतपणे सुरू असते. दिवसभरात स्वखर्चाने ते १० ते १२ कॅन बिसलेरीचे शुद्ध पाणी विकत घेऊन रस्त्यावरील गोरगरीब रिक्षावाले, ऑटोवाले, मेट्रोचे कर्मचारी, फुटपाथवरील दुकानदारांसह शहरात पायी चालणाऱ्यांना पाजतात. बहुतेक जण त्याच्या जवळील थंडगार पाणी पिऊन तृष्णा भागवितात. काही मात्र शंकेच्या नजरेने त्यांच्याकडे पाहून पाणी पिण्यास नकार देतात. मात्र, आशीषला त्याचे काहीच वाटत नाही. जय श्रीराम बोलून ते पुढे निघतात. उल्लेखनीय म्हणजे, रस्त्यावर एखादा अपंग किंवा अंध व्यक्‍ती दिसला तर ते स्वत: दुचाकीवरून उतरून त्याला स्वत:च्या हाताने पाणी पाजतात. 

आशीष यांची आर्थिक स्थिती बेताची असून, ते एका खासगी कंपनीत सेल्समनचे काम करतात. परंतु त्यांचे हे उदरनिर्वाहाचे साधनही आता हिरावले जाणार आहे. कारण कंपनीतून त्यांना ‘अल्टिमेटम’ मिळाला असून, ३० तारखेनंतर त्यांची नोकरी जाणार आहे.