नागपूर - लोकसभा निवडणुकीपूर्वी मोदी सरकारने शेतकऱ्यांसाठी (Farmer) सन्मान योजना (Sanman Yojana) आणली. या योजनेंतर्गत वर्षाला सहा हजार रुपये शेतकऱ्यांच्या खात्यात जमा करण्यात येत आहेत. करदाते, नोकरदार असलेल्या ६ हजारांवर वर शेतकऱ्यांनी खात्यात जमा झालेला शेतकरी सन्मान निधी केंद्र सरकारला (Central Government) परत केला आहे. ही रक्कम सुमारे एक कोटी ६३ लाखांच्या घरात आहे. .

केंद्र सरकारने शेतकऱ्यांच्या सन्मानार्थ दोन वर्षांपूर्वी शेतकरी सन्मान योजना सुरू केली. प्रत्येकी दोन हजार रुपये याप्रमाणे तीन टप्प्यांमध्ये एकूण सहा हजार रुपये वर्षाला शेतकऱ्यांना दिले जातात. ही रक्कम सात-बारावर नाव असलेल्या शेतकऱ्यांच्या खात्यात थेट जमा केली जाते. पंतप्रधान नरेंद्र मोदी यांनी लोकसभेच्या निवडणुकीच्या तोंडावर ही योजना जाहीर केली होती. ती राबविण्यासाठी शासकीय यंत्रणेला पुरेसा वेळ मिळाला नसल्याने त्यांची चांगलीच तारांबळ उडत आहे. त्यामुळे सात-बारावर ज्यांची नावे आहेत, त्यांच्या खात्यात रक्कम जमा केली जात आहे.

यात धनाढ्य शेतकरी, व्यावसायिक शेतकरी तसेच नोकरदार शेतकऱ्यांचाही समावेश आहे. नागपूर जिल्ह्यात दोन लाख १० हजार ३३८ शेतकऱ्यांच्या खात्यात आतापर्यंत पैसे वळता करण्यात आले आहेत. या योजनेसाठी केंद्र सरकारकडून काही निकष निश्चित करण्यात आले. निकषात बसत नसलेल्या शेतकऱ्यांकडून दिलेले पैसे परत घेण्याचे आदेश केंद्र सरकारने दिले. जिल्ह्यात ६ हजार ३१ शेतकरी निकषात बसत नसल्याचे समोर आले.

निकषात बसत नसलेल्या शेतकऱ्यांना पैसे परत करण्याच्या सूचना देण्यात आल्या. पैसे परत न केल्यास थेट बँकेतून पैसे वळते करण्याचा इशारा प्रशासनाकडून देण्यात आला होता. अपात्र ठरविण्यात आलेल्या शेतकऱ्यांनी पैसे परत करण्यास सुरुवात केली. आतापर्यंत ५,७३० शेतकऱ्यांनी एक कोटी ६३ लाख ७२ हजार रुपये परत केल्याची नोंद जिल्हा प्रशासनाकडे आहे. काही शेतऱ्यांना पैसे परत करण्यास टाळाटाळ केल्यांने त्यांच्या खात्यातून थेट रक्कम कपात करून शासन जमा करण्यात आल्याची माहिती सूत्रांनी दिली.