Ambulance Driver Strike: प्राथमिक आरोग्य केंद्रांत व उपजिल्हा रुग्णालयांत ‘१०२’ रुग्णवाहिकेवर कार्यरत चालकांचे मानधन चार महिने उलटूनही देण्यात आले नाही. यापूर्वी केलेल्या आंदोलनादरम्यान ३१ जानेवारीला मानधन देण्याचे आश्‍वासन दिले होते. मात्र, तरीदेखील आश्‍वासनाची पूर्तता करण्यात आली नाही. त्यामुळे रुग्णवाहिकाचालकांनी येत्या पाच फेब्रुवारीपासून कामबंदची हाक दिली आहे.

‘१०२’ रुग्णवाहिकेवर कार्यरत चालक २४ तास सेवा देतात. त्यांना चार महिन्यांपासून मानधन मिळाले नाही. कंपनीकडे विचारणा केल्यास उडवाउडवीचे उत्तर देण्यात येते. जिल्हाधिकाऱ्यांना निवेदन दिल्यानंतर २२ जानेवारीपासून कामबंद आंदोलन सुरू करण्यात आले. मात्र, जिल्हा कार्यक्रम व्यवस्थापकांनी कंपनीसोबत बोलून ३१ जानेवारीला तीन महिन्यांचे मानधन देण्याचे आश्‍वासन दिले होते. (Latest Marathi News)

आता, त्याची पूर्तता करण्यात आली नाही. त्यामुळे चालकांवर उपासमारीची वेळ आली आहे. संबंधित कंपनीची चौकशी करून काळ्या यादीत टाकण्यात यावे. तत्काळ चार महिन्यांचे मानधन न मिळाल्यास येत्या पाच फेब्रुवारीपासून कामबंद करण्याचा इशारा जिल्हा प्रशासनाला देण्यात आला आहे.