नागपूर ः चार्टर्ड अकाउंटंटचे शिक्षण घेत असलेल्या दोन विद्यार्थ्यांनी आत्महत्या केली. एकाने गळफास घेतला तर दुसऱ्याने बहुमजली इमारतीवरून उडी घेऊन आत्महत्या केली. दोनही घटना आज उघडकीस आल्या.

सीएच्या अभ्यासक्रमाला असलेल्या विद्यार्थ्याने पंख्याला दुपट्टा बांधून गळफास घेतला. ही घटना खरे टाउनमधील श्री अपार्टमेंट येथे सोमवारी दुपारी उघडकीस आली. आदित्य रवीकुमार वरदराजन (वय २४) असे मृतकाचे नाव आहे. आदित्य हा सीएच्या अभ्यासक्रमाला होता. अभ्यासाच्या तणावातून आदित्य याने आत्महत्या केली. 

अधिक माहितीसाठी - तुझ्याशी लग्न करायचे आहे, असे बोलून अधिकारी युवतीचा त्याने केला पाठलाग, युवकाविरुद्ध गुन्हा दाखल

आत्महत्येपूर्वी त्याने सहापानी चिठ्ठी लिहिली. माझ्या आत्महत्येला कोणीही जबाबदार नाही,असे चिठ्ठीत लिहिले आहे. याप्रकरणी सीताबर्डी पोलिसांनी आकस्मिक मृत्यूची नोंद करून तपास सुरू केला आहे. आदित्यचे वडील रवीकुमार सीए आहेत. आदित्यच्या आत्महत्येचे वरदराजन कुटुंबावर दु:खाचा डोंगर कोसळला आहे.

दुसऱ्या घटनेत, धंतोलीतील एका रुग्णालयात उपचारासाठी वडिलाला दाखल केल्यानंतर आईसोबत वाद झाल्यामुळे उज्ज्वल प्रदीप जैन (२३, रा. महसूर,खंडवा-मध्यप्रदेश) याने बहुमजली इमारतीवरून उडी घेऊन आत्महत्या केली. तीन दिवसांनंतर दुर्गंधी पसरल्यानंतर ही घटना उघडकीस आली. उज्ज्वल हा सीएचे शिक्षण घेत होता. वडिलाला पोटाचा विकार असून त्यांच्यावर रुग्णालयात उपचार सुरू आहे. 

हेही वाचा - डोळ्यांना कमी दिसत असल्याने सासऱ्याने रक्कम दिली जावयाकडे; मात्र, केला विश्‍वासघात

३ डिसेंबरला डॉक्टरांच्या विनापरवानगी उज्ज्वलने वडिलांना ज्यूस पाजला. त्यामुळे डॉक्टरांनी नातेवाइकांना फटकारले. त्यांनी उज्ज्वलला झापले. त्याला राग आल्याने तो रात्री नऊ वाजता निघून गेला. गेटवेल रुग्णालयाच्या समोर असलेल्या अभिजित टॉवर नावाच्या बहुमजली इमारतीवर चढला. तेथून उडी घेऊन त्याने आत्महत्या केली. रात्री बारा वाजेपर्यंत त्याची वाट बघितल्यानंतर नातेवाइकांनी धंतोली पोलिस ठाण्यात मिसींगची तक्रार नोंदवली. तीन दिवसांनंतर परिसरातून दुर्गंध येत असल्यामुळे ही घटना उघडकीस आली.

संपादन - अथर्व महांकाळ