नागपूर : मराठवाडा आणि विदर्भातील उद्योगांना दिली जाणारी सवलत राज्याच्या ऊर्जा विभागाकडून गेल्या चार महिन्यापासून बंद केली आहे. ऊर्जामंत्री डॉ. नितीन राऊत (minister Nitin Raut) यांनी ही योजना लवकरच कार्यान्वित केली जाईल असे आश्वासन दिले होते. मात्र, त्याबाबत अद्याप निर्णय प्रलंबित आहे. त्यामुळे नागपूर जिल्ह्यातील २०० पेक्षा अधिक स्टील, प्लॅस्टिक आणि फेरो अलाईड उद्योगांचे विजेचे बिल वाढले आहे. वाढलेल्या बिलामुळे आर्थिक गणित विस्कळित झाले आहे. यात काम करणाऱ्या सात ते आठ हजार लोकांच्या रोजगारावर संक्रांत (Unemployment issue nagpur) येण्याचे संकेत मिळू लागले आहेत.

मराठवाडा आणि विदर्भातील उद्योजकांना वीज सवलत योजना जाहीर करण्यात आली होती. ही योजना पाच वर्षांसाठी असल्याने ती २०२५ मध्ये संपणार आहे. सध्याच्या अर्थसंकल्पात महाआघाडी सरकारने १२०० कोटी रुपयांचा निधी ठेवला आहे. या योजनेमुळे मराठवाडा आणि विदर्भातील उद्योजकांचा विकास होत आहे. नवीन उद्योग येत आहेत. असे असताना योजनेतील सवलत २०२१ मध्ये थांबविण्यात आली आहे. डॉ. नितीन राऊत यांची शहरातील उद्योजकांनी भेट घेतली. वीज सवलतीबाबत विचारणा करण्यात आली होती. त्यांनी ही योजना बंद झालेली नाही. ती लवकरच लागू केली जाणार असल्याचे सांगितले. ऊर्जा विभागाच्या सचिवांसह उद्योजकांसोबतही बैठक झाली. मात्र, गेल्या चार महिन्यांपासून सवलत बंद असून याचा उद्योगांवर परिणाम होत असल्याचे उद्योजकांनी सांगितले.