नागपूर : गेल्या काही वर्षांत सामाजिक व्यवस्था अतिशय ढासळल्याचे चित्र निर्माण झाले आहे. त्यातून क्षुल्लक वादाची परिणिती खुनात झाली असून दहा महिन्यांत क्षुल्लक भांडणातून ३३ खून झाल्याचे धक्कादायक वास्तव समोर आले आहे.

कुठलाही वाद झाल्यास पूर्वी मार्ग काढण्यासाठी आणि दोन्ही व्यक्तीच्या मनातील द्वेष दूर करण्यासाठी वरिष्ठ मंडळींकडून समजूत घातली जात होती. मात्र, गेल्या काही वर्षांत सोशल मिडियाने कौटुंबिक व्यवस्थेत बराच दुरावा निर्माण केला असून त्याचे दुश्‍य परिणाम आता समाजावर दिसू लागले आहेत. क्षुल्लक वादातून आक्रमक होत त्यातून मारहाण करीत, टोकाचे पाऊल उचलून खून करण्याइतपत मजत जात असल्याचे दिसते.

त्यातूनच गेल्या दहा महिन्यांत घडलेल्या ६८ खूनांच्या घटनांमध्ये ३३ खून क्षुल्लक वादातून झालेत. यामध्ये मुख्यतः पती-पत्नीचे वादातून अकरा खून झाल्याची माहिती आहे. याशिवाय मुलाकडून आईसोबत झालेल्या वादातून ३ खून, वडिलांसोबत झालेल्या वादातून ३ खून तर सुनेने सासूचा खून केल्याची माहिती आहे. याउलट जुन्या भांडणातून आणि जागेतून प्रत्येकी आठ खूनाची नोंद करण्यात आलेली आहे.

अनैतिक संबंध, चारित्र्यावर संशय

नात्यांत एकमेकांवर संशय आणि अनैतिक संबंधातून गेल्या दहा महिन्यांत १६ खून झाल्याची नोंद करण्यात आली आहे. यामध्ये प्रामुख्याने पतीने पत्नीवर घेतलेला संशय आणि पती वा पत्नीच्या अनैतिक संबंधातून हे खून झाल्याचे दिसते.

निम्म्यांची नाही गुन्हेगारी पार्श्‍वभूमी

खुनाच्या गुन्ह्यात एकेकाळी गुन्हेगारी पार्श्‍वभूमी असलेल्या गुन्हेगारांची चलती असायची. मात्र, आता ६८ पैकी ३३ खुनात गुन्हेगारी नसलेल्या व्यक्ती खुनात आरोपी म्हणून नोंद करण्यात आली आहे. याउलट केवळ १३ प्रकरणात दोन्ही आरोपी गुन्हेगार असल्याचे दिसून आले आहे.

अशी आहे आकडेवारी

• क्षुल्लक कारणातून खून - ३३

• प्रेमसंबंध, चारित्र्यावर संशय - १६

• जुने भांडण - ८

• जमिनीचा वाद - ८

• दारूच्या वादातून - ३

• एकूण - ६८