नागपूर : पाच वर्षीय मुलीच्या डोळ्या देखत भरधाव मालवाहू वाहनाने तिच्या वडिलांना चिरडले. यात जागीच वडिलांचा मृत्यू झाला. ही हृदयद्रावक घटना खापरी नाक्याजवळ गुरुवारी सायंकाळी घडली. अतुल भागवत बांते (३१) रा. खापरी पुनर्वसन असे मृताचे नाव आहे.

अतुल हे लहान मुलीला खापरी, वर्धा रोडवर गेले होते. ते गेटवेल रुग्णालयात ऑपरेटर होते. त्यांची पत्नी सीमा केअर रुग्णालयात परिचारिका आहे. अतुल आणि सीमाला गुर्वी (५) आणि जान्हवी (१८ महिने) या दोन मुली आहेत. बुधवारी प्रकृती अस्वस्थ असल्याने अतुलने कामावरून सुटी घेतली होती. सीमा बसने कामावर गेली होती. सायंकाळी ५ वाजताच्या सुमारास सीमा आपली बसमध्ये बसून खापरीसाठी निघाली.

तिला घेण्यासाठी अतुल गुर्वीसह दुचाकीने खापरी नाक्याजवळ आले. एनएच-७ बीअर शॉपीसमोर वाहन उभे केले. गुर्वीला त्यांनी वाहनावरच बसवून ठेवले. दुसऱ्या बाजूला जाण्यासाठी रस्ता ओलांडत असताना भरधाव आलेल्या मालवाहूच्या चालकाने त्यांना जबर धडक दिली आणि फरार झाला. घटनेने परिसरात खळबळ उडाली. घटनास्थळी लोकांची गर्दी जमली. या दरम्यान सीमाची बसही तेथे पोहोचली. काय झाले हे पाहण्यासाठी ती गेली असता

मुलीच्या डोळ्यासमोर वडिलांना वाहनाने चिरडले

अतुल रक्ताच्या थारोळ्यात पडून होते. त्याचवेळी लकडगंज विभागाचे एसीपी सचिन थोरबोलेही रस्त्याने जात होते. अपघात झाल्याचे पाहून त्यांनी वाहन थांबविले. तत्काळ अतुलला आपल्या वाहनातून खासगी रुग्णालयात नेले, मात्र डॉक्टरांनी तपासून मृत घोषित केले.

अपघाताची माहिती मिळताच बेलतरोडी पोलिस पोहोचले. अतुलचे वडील भागवत बांते यांच्या तक्रारीवरून अज्ञात वाहन चालकावर गुन्हा नोंदविण्यात आला. अतुलच्या मृत्यूने बांते कुटुंबाला मोठा धक्का बसला आहे.