नागपूर - संततधार पावसामुळे विमान प्रवास चांगलाच मंदावला आहे. विमान प्रवासी संख्या ३० ते ४० टक्क्यांनी कमी झालेली आहे. ही घट दिवाळीच्या सुटीच्या कालावधीत भरून निघण्याची शक्यता आहे. उन्हाळ्यात गो फर्स्ट एअरलाईनने विमान उड्डाण बंद केल्याने विमानाच्या तिकिटात विक्रमी वाढ झाली होती. त्याचा फटका पर्यटकांना बसला होता. आता प्रवासी कमी झाल्याने भाडे कपातही करण्यात आलेली आहे.

उन्हाळ्यात शालेय सुट्ट्यांमुळे विमान कंपन्यांचे बुकिंग ९० टक्के राहत होते. इंदूर, हैदराबाद या मार्गांवर केवळ एकाच विमान असल्याने कंपन्याही मनमानी भाडे आकारत होत्या. आता उन्हाळ्याच्या सुट्या संपल्याने भाडे कपात केली आहे. दीड ते दोन महिन्यांपूर्वी मुंबई, दिल्लीसह अन्य ठिकाणांसाठी १० ते १५ हजार रुपये भाडे आकारले जात होते. आता ते चार ते साडेपाच हजारांवर आले आहे.

दररोज ३४ उड्डाणे

डॉ. बाबासाहेब आंबेडकर आंतरराष्ट्रीय विमानतळावरून एकूण ३४ उड्डाणे होत आहेत. तेवढीच विमाने उतरतही आहेत. एकूण ६४ विमाने ये-जा करीत आहेत. सर्वाधिक उड्डाणे मुंबईहून होत आहेत. त्यात दररोज सात आणि एक विमान आठवड्यातून दोन दिवस आहे. त्याचप्रमाणे दिल्लीला जाणाऱ्या विमानांची संख्याही वाढून पाच झालेली आहे.

पुण्याकरिता पाच, बेंगळुरूसाठी तीन, हैदराबाद, कोलकाता, इंदूर लखनौ, गोवा, नाशिक, चेन्नईसाठी प्रत्येकी एक विमान आहे. अहमदाबाद दोन, बेळगाव (स्टार एअर) दोन, आंतरराष्ट्रीय विमानामध्ये शारजाला जाणारे एक आणि दोहाला एक विमान उड्डाण करते.

दिवाळीत वाढणार प्रवासी

विद्यार्थ्यांच्या सुट्या संपल्या असून प्रवासी संख्या आता कमी झालेली आहे. ही घट दिवाळीतील सुट्यांमध्येच भरून निघणार आहे. त्यानंतर पुन्हा एकदा विमान कंपन्यांकडून विमान भाडे वाढवले जाणार आहे. नागपूर शहरातील अनेक विद्यार्थी व नोकरदार दिवाळीत घरी येतात. त्यामुळे मुंबई, पुणे, बेंगळुरू, हैदराबाद येथील तिकिटांचे दरही गगनाला भिडणार आहे