नागपूर : महापालिकेच्या पाचपावली सूतिकागृह रुग्णालयात ऑक्सिजनची व्यवस्था असलेल्या ७० बेडची सुविधा उद्या सोमवारपासून सुरू होईल, असे आज महापौर दयाशंकर तिवारी यांनी सांगितले. येथेच सहा किलोलिटरचा ऑक्सिजन प्रकल्प महापालिका उभारणार असल्याचेही त्यांनी नमूद केले.

महानगरपालिकेच्या माध्यमातून पाचपावली सूतिकागृह येथे कोव्हिड रुग्णांसाठी ११० खाटांची व्यवस्था केली आहे. महापौरांनी आज या रुग्णालयाची पाहणी केली. ऑक्सिजनची व्यवस्था असलेले ७० बेड्सचे रुग्णालय सोमवारपासून नागरिकांच्या सेवेत सुरू होईल. या रुग्णालयातील लसीकरण केंद्र स्थानांतरित करून बेड्सची संख्या ११० बेड्सपर्यंत करण्याचे प्रयत्न सुरू आहेत. यासाठी सध्या येथे सुरू असलेल्या लसीकरण केंद्राला बाळाभाऊपेठ येथील मनपा शाळेच्या इमारतीत हलविण्यात येइल.

मनपा आयुक्त राधाकृष्णन बी. यांच्या मार्गदर्शनात मनपाची चमू या कामात लागली असल्याचेही त्यांनी सांगितले. सध्या नागपूरमध्ये ऑक्सिजनचा तुटवडा असून, या रुग्णालयात ऑक्सिजन प्लांट उभारण्यात येत आहे. लिक्विड ऑक्सिजनला गॅसमध्ये परिवर्तन करून रुग्णांना दिला जाईल. या रुग्णालयाची व्यवस्था स्वयंसेवी संस्था अशरफी फाउंडेशन यांना दिली आहे. डॉक्टर्स, फिजिशियनसुद्धा येथे राहतील. यावेळी महापौरांसोबत उपायुक्त मिलिंद मेश्राम, झोनल आरोग्य अधिकारी डॉ. दीपांकार भिवगडे आणि रुग्णालयातील डॉक्टर्स उपस्थित होते.

ऑक्सिजन प्रकल्प असलेले पहिले रुग्णालय

या रुग्णालयात भरती रुग्णांना ऑक्सिजनचा पुरवठा करण्यासाठी मनपा सहा किलोलिटरचा ऑक्सिजन प्लांट उभारणार आहे. अशा प्रकारची व्यवस्था असणारे हे नागपुरातील पहिले शासकीय रुग्णालय आहे, असे महापौरांनी आवर्जून सांगितले.

संपादन - अथर्व महांकाळ