नागपूर : शारीरिक संबंधास नकार देणाऱ्या प्रेयसीवर बळजबरी लैंगिक अत्याचार करण्याचा प्रयत्न प्रियकराने केला. याप्रकरणी अंबाझरी पोलिसांनी सूरज हरी शाहू (३०, रा. काचीपुरा, रामदासपेठ) याच्यावर गुन्हे दाखल करून अटक केली आहे.

प्राप्त माहितीनुसार, सूरज शाहू हा हॉटेलमध्ये शेफ म्हणून नोकरीला आहे. १९ वर्षीय युवती आणि तो एकाच शाळेत शिकत होते. तेव्हापासून त्यांची ओळख होती. ओळखीचे रूपांतर प्रेमात झाले. दोघांच्याही प्रेमसंबंधाची वस्तीत चर्चा होती. काही कारणामुळे त्यांच्यात ब्रेकअप झाले. सूरजला दारूचे व्यसन लागले. त्यानंतर तो तिला भेटायचा आणि प्रेमसंबंध ठेवण्यासाठी बळजबरी करीत होता. त्यामुळे ती त्याला टाळत होती. तिने त्याच्याशी बोलणे बंद केले होते. मात्र, सूरज हा तरुणीला शारीरिक संबंध ठेवण्यासाठी बळजबरी करीत होता.

शुक्रवारी सायंकाळी सात वाजताच्या सुमारास तरुणी ही घरी एकटीच हजर होती. त्यावेळी सूरज हा घरी आला. ‘मला तुझ्याशी लग्न करायचे आहे, तू माझी आहेस’ असे म्हटले. तरुणीने त्याला समजाविण्याचा प्रयत्न केला असता तो तिच्या अंगावर धावून आला. त्याचप्रमाणे तिच्याशी शारीरिक संबंधासाठी बळजबरी करायला लागला. तिने नकार देताच मारहाण केली. ‘मी तुला सोडणार नाही’ असे बोलून त्याने तिच्याशी अश्‍लील चाळे करीत विनयभंग केला. याप्रकरणी तरुणीच्या तक्रारीवरून अंबाझरी पोलिसांनी गुन्हा नोंदवून आरोपी सूरज यास अटक केली.

सुनेवर बळजबरीचा प्रयत्न

घरात एकटी असल्याचे बघून सासऱ्याने सुनेला शारीरिक संबंधाची मागणी करीत बळजबरी करण्याचा करीत विनयभंग केला. याप्रकरणी वाडी पोलिसांनी सासऱ्यावर विनयभंगाचा गुन्हा दाखल केला आहे. सून आणि सासरा हे एकाच घरात परंतु, वेगवेगळे राहतात. शुक्रवारी रात्री ११०.३० च्या सुमारास सुनेने पतीसोबत जेवण केले आणि ती घरात बसली. त्यावेळी तिचा पती हा घराबाहेर गेला होता.

सासरा हा खोलीतून निघून सुनेकडे एकटक पाहत होता. त्यामुळे सून घरात किचनमध्ये निघून गेली. तिच्या मागोमाग सासरा देखील घरात आला. ‘मला तुझी गरज आहे, माझ्याशी संबंध ठेव’ असे बोलून सुनेला पकडण्याचा प्रयत्न केला. सासऱ्याला दूर लोटून नकार देत सूनेने आरडाओरड करण्याचा प्रयत्न केला असता त्याने तिचे केस पकडून तिचा विनयभंग केला. याप्रकरणी वाडी पोलिसांनी सासऱ्यावर विनयभंगाचा गुन्हा दाखल केला आहे.