नागपूर : ओळखीच्या असलेल्या दांपत्याच्या सहा वर्षीय मुलाचे एका युवकाने अपहरण केले. त्याला निर्जन ठिकाणी नेऊन त्याच्यावर लैंगिक अत्याचार करण्याच्या प्रयत्नात असताना नागरिकांना त्याला बघितले. नागरिकांनी त्याची चांगली धुलाई करीत पोलिसांच्या ताब्यात दिले. नागरिकांच्या सतर्कतेमुळे मोठी घटना टळली. सोनू छेडी यादव (२५, बडवी, जि. सिद्धार्थनगर, उत्तरप्रदेश) असे या नराधमाचे नाव आहे.

सोनू यादव हा सात आठ दिवसांपूर्वी कामासाठी नागपूरला आला होता. गजानननगर येथे भाड्याने खोली घेऊन तो रहात होता. पीडित मुलाच्या आईवडिलांचे राजीवनगर येथे चहा नास्त्याचे दुकान आहे. त्यामुळे मुलगा देखील दुकानाच्या आजूबाजूलाच खेळत असतो. शुक्रवारी दुपारी एकच्या सुमारास आरोपी सोनू हा मुलाच्या दुकानात आला. तुला चॉकलेट आणि कुरकुरे घेऊन देतो असे मुलाला आमिष दाखवून पळवून नेले.

राजीवनगर येथील वाघधरा नाल्याजवळ एका झुडपात त्याने मुलाला नेले. मुलाच्या अंगातील कपडे काढत असताना हा प्रकार त्याच परिसरात राहणाऱ्या लोकांच्या लक्षात आला. त्यामुळे लोक घटनास्थळी आले. त्यांनी सोनूला काय करतोस अशी विचारणा केली. परंतु, त्याने उडवाउडवीची उत्तरे दिल्याने लोकांचा संशय बळावला. लोकांनी सोनूला पकडून बेदम चोप दिला. लोकांपैकी काहीजण मुलाच्या आईवडिलाला ओळखत होते. त्याच लोकांनी ही माहिती मुलाच्या आईला दिली. याप्रकरणी मुलाच्या आईच्या तक्रारीवरून एमआयडीसी पोलिसांनी अपहरण आणि पोक्सो अन्वये गुन्हा नोंदवून सोनू यादव यास अटक केली.