नागपूर : विवाहित प्रेयसीने पळून जाण्यास नकार दिल्यामुळे प्रियकराने हाताच्या मनगटाची नस कापून आत्महत्या करण्याचा प्रयत्न केला. ही घटना मंगळवारी बेलतरोडीत उघडकीस आली. दीपक संजय पाटील (२७, रा. येनगाव, ता. बोदवड, जि. जळगाव) असे आत्महत्या करण्याचा प्रयत्न करणाऱ्‍या प्रियकराचे नाव आहे.

पोलिसांनी दिलेल्या माहितीनुसार, दीपक पाटील हा पुणे येथे वाहनचालक आहे. त्याची फेसबुकच्या माध्यमातून बेलतरोडी येथे राहणाऱ्‍या २६ वर्षीय विवाहितेशी ओळख झाली. ओळखीचे रूपांतर प्रेमात झाले. त्यानंतर ते व्हॉट्सअ‍ॅपवर चॅटिंग करीत असत.

जाणून घ्या - अख्खं गाव हळहळलं! पती-पत्नी पाठोपाठ मुलीचाही मृत्यू, एकाचवेळी निघाली तिघांची अंत्ययात्रा

जुलै २० मध्ये दीपक हा नागपूरला आला. तिने दूरचा नातेवाईक असल्याची ओळख पतीला करून दिली. पती कामावर गेल्यावर ते मौजमजा करीत होते. याची कुणकुण पतीला लागली. त्यामुळे त्यांनी प्रेमात अडसर नको म्हणून पळून जाऊन सोबत राहण्याचा निर्णय घेतला. ३० जुलै रोजी पती कामावर गेल्यानंतर दोघांनीही पळ काढला. सहा महिने दोघेही येनगाव येथे राहिले. दरम्यान, तरुणीच्या पतीने बेलतरोडी पोलिसात पत्नी पळून गेल्याची तक्रार केली. पोलिसांनी हरविल्याची तक्रार नोंदविली.

पोलिसांनी घातली समजूत

बेलतरोडी पोलिसांनी तरुणीचा शोध घेतला. पोलिसांनी तरुणीला आणण्याचा प्रयत्न केला होता. परंतु, तरुणीने नागपूरला येण्यास स्पष्टपणे नकार देत प्रियकरासोबतच राहण्याचा हट्ट केला. पोलिसांनी ही माहिती तरुणीच्या आई-वडिलांना दिली. त्यानंतर आई-वडिलांनी तिची समजूत काढून नागपूरला आणले. पती-पत्नीत समझोता झाल्याने पतीने तिला ठेवून घेतले.

अधिक वाचा - पत्नीच्या अनैतिक संबंधातून सेवानिवृत्त जवानाचा खून; पती लवकर घरी आल्याने घडला थरार

हाताची कापली नस

चार दिवसांपूर्वी दीपक हा नागपूरला आला. तो तरुणीच्या घरीच मुक्कामी थांबला होता. दरम्यान, त्याने तरुणीला पुन्हा पळून जाऊन संसार थाटण्याचा  आग्रह केला होता. परंतु, तरुणीने त्याला स्पष्टपणे नकार दिला. सोमवारी तरुणी ही पतीसोबत बाहेर गेली होती. तरुणी सोबत येत नसल्याचे पाहून दीपकने चाकूने हाताच्या मनगटाच्या नसा कापून आत्महत्या करण्याचा प्रयत्न केला. तरुणी व पती घरी आले असता हा प्रकार उघडकीस आला. याप्रकरणी बेलतरोडी पोलिसांनी पतीच्या तक्रारीवरून प्रियकराविरुद्ध गुन्हा दाखल करून अटक केली.