नागपूर : घरात अठराविश्‍व दारिद्य्र... पतीच्या निधनानंतर मुलांना शिकविण्याची जिद्द... दोन मुलींच्या शिक्षणाची जबाबदारी... ती पेलण्यासाठी ती रात्रंदिवस राबली. आपल्यावर जी वेळ आली ती आपल्या मुलांवर येऊ नये. शिक्षणाची कास धरून त्यांनी मोठे व्हावे हेच स्वप्न उराशी बाळगून त्या माऊलीने रक्‍ताचे पाणी केले. तिची हे मेहनत रात्रंदिवस डोळ्यांनी पहाणाऱ्या मुलींनी आई तुझे कष्ट निरर्थक जाणार नाही, असे तेव्हाच सांगितले होते. अखेर यशाची पहिली पायरी समजल्या जाणाऱ्या दहावीच्या परीक्षेत घवघवीत यश मिळवीत त्यांनी स्वत:ला सिद्ध केले. ही यशोगाथा आहे भूमी सुनील पाटील हिची. यशाला गवसणी घालत दहावीत तब्बल 81 टक्‍के गुण मिळवले.
भूमी लहान असतानाच ज्योती पाटील यांच्या पतीचे निधन झाले. भूमी आणि सृष्टी अशा दोन्ही चिमुकल्यांना उराशी घेऊन ज्योती यांनी संसार सांभाळला. दिवसरात्र शिलाई मशीन चालवून मुलींना शिक्षणाची ओढ लावली. अशातच नागपूर शहर पोलिस दलात सहायक पोलिस निरीक्षक पदावर कार्यरत असलेले गायकवाड पती-पत्नीच्या संपर्कात ज्योती आल्या. त्यांनी ज्योतीच्या हाताला काम मिळावे म्हणून आपल्या मुलांचा सांभाळ करण्याचे काम दिले. आईसोबत भूमी आणि सृष्टीसुद्धा गायकवाड मॅडमच्या संपर्कात आल्यात. अभ्यास हुशार असलेल्या भूमीची चुणूक गायकवाड मॅडम यांनी ओळखली. तिला पुस्तके आणि वह्यांसाठी मदत केली. अभ्यास करताना आलेल्या अडचणीसुद्धा सोडविल्या. भूमीला योग्य मार्गदर्शन केल्याने पंडित बच्छराज शाळेत दहावीत शिकणाऱ्या भूमीने 81 टक्‍के गुण मिळवले. यशाचे श्रेय अनुपमा मॅडम यांच्यासोबतच शिक्षक वृंद, आई, काका-काकू आणि आजी-आजोबांना देते.
गायकवाड यांच्या संपर्कात यांच्या आलेल्या भूमीला त्यांनी लागेल ती मदत केली. गायकवाड यांच्या घरी राहून भूमीने त्यांचाच आदर्श डोळ्यांपुढे ठेवला असून दहावी ही आयुष्याची पहिली पायरी असून, मला खूप शिकून पोलिस अधिकारी व्हायचे आहे, असा मनोदय भूमी पाटील हिने बोलून दाखवला.
आपण मुलींसाठी रात्रंदिवस मेहनत घेतली. कुटुंबाला हातभार लागावा म्हणून भूमीने नोकरीही स्वीकारली. नोकरी आणि अभ्यास तसेच घरची कामे अशा तिन्ही पातळ्यांवर भूमीने स्वत:ला सिद्ध केले, हे सांगताच ज्योती यांच्या डोळ्यांत आनंदाश्रू तरळले.
संपादन : अतुल मांगे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.