देशभरात पारा घसरल्याने थंडीचा तखाडा जाणवतोय. उत्तर महाराष्ट्र आणि विदर्भात याचं प्रमाण अधिक आहे. त्यामुळे ठिकठिकाणी शेकोट्या पेटवण्यात येत आहेत. थंडी घालवण्यासाठी लोकं उब शोधत आहेत. अशातच पोलिसांनी चोरट्यांचा किस्सा सांगितला. नागपूर पोलिसांनी दुचाकी चोरांना पकडलंय खरं, पण त्यांनी दुचाकी का जाळली, याचं कारण ऐकून पोलीस अवाक झाले. (nagpur crime news)

संपूर्ण राज्यभरात मोठ्या प्रमाणात थंडी पडली आहे. नागपुरातही पारा 7 अंशांपर्यंत खाली गेला आहे. नागपुरात पोलीस काही दिवसांपासून दुचारी चोरांच्या शोधात होते. कारण पोलीस स्टेशनच्या (Nagpur Police) आवारातून 10 दुचाकी चोरीस गेल्या होत्या. अनेक दिवसांपासून पोलीस चोरट्यांच्या मागावर होते. पण शोधाशोध केल्यानंतरही चोरांचा मागोवा मिळत नव्हता. अखेर पोलिसांनी चोरट्यांचा पत्ता मिळवला. पण त्यांच्याकडे जळालेली दुचाकी पाहून त्यांना प्रश्न पडला. आणि यातून नवीनच माहिती समोर आली. (Bike Burnt in Nagpur)

कुख्यात चोर छोटा सर्फराज याने हे कृत्य केलंय. गेल्या काही दिवसांपासून या टोळीने शेतात दुचाकी लपवून ठेवल्या होत्या. यानंतर त्यांनी शेतातच लपण्यासाठी आसरा घेतला. पोलिसांनी त्यांना पकडल्यानंतर बाईक जळालेली सापडली. यशोधरा नगर पोलीस स्टेशन या ठिकाणी ही दुचाकी आणण्यात आली आहे.

शेतात लपून बसले खरे...पण थंडी सहन होत नव्हती!

पोलिसांपासून लपण्यासाठी चोरट्यांनी शहराबाहेर एका शेतात आसरा घेतला. पोलिसांच्या हाती लागू नये, म्हणून चोरांनी शहराबाहेर लपण्याची शक्कल लढवली. यावेळी थंडीचा कडाका वाढल्याने त्यांनी लाकडं शोधण्याचा प्रयत्न केला. मात्र, ऐनवेळी काहीच सरपण न सापडल्याने त्यांनी सोबतची दुचाकीच पेटवून दिली.