नागपूर : हनिफचे काही वर्षांपूर्वी लग्न झाले. मात्र, त्याचा पत्नीसोबत सतत वाद होत होता. याच वादातून तो पत्नीला मारहाणही करीत होता. क्षुल्लक क्षुल्लक कारणावरून होत असलेल्या मारहाणीमुळे पत्नी वैतागली होती. ती नेहमी पतीला न मारण्याची विनवनी करीत होती. मात्र, याचा पतीवर काहीही परिणाम होत नव्हता. सततच्या मारहाणीला कंटाळलेल्या पत्नीने माहेरी फोन करून भावंडांना बोलावून घेतले. घरी आलेल्या भावंडांनी भांडण केल्याने पुढील घटनाक्रम घडला... 

पोलिसांनी दिलेल्या माहितीनुसार, शेख आरीफ शेख हनिफ (35, रा. दसरा रोड, कोतवाली) याचे पत्नीसोबत नेहमी घरगुती कारणावरून भांडण होत होते. भांडण झाल्यानंतर तो पत्नीला मारहाण करीत होता. यामुळे पत्नी त्याला भीत होती. मंगळवारीही पती-पत्नीमध्ये भांडण झाले. चिडलेल्या पत्नीने थेट माहेरी फोन केला. तसेच भावंडांना माहिती देत घरी बोलावून घेतले. यावेळी तिच्या माहेरून परवेश शेख उर्फ टिकू कलीम शेख (25), फैजल शेख कलीम शेख (22) आणि कलीम शेख अकबर शेख (52) सर्व रा. गणेश मंदिर जवळ, भवानी मंदिर, पारडी ही सर्व मंडळी शेख आरीफ याच्या घरी दाखल झाली.

हेही वाचा - सूर्य आग ओकत असताना ते उठत, बसत, पाणी पीत चालले होते, मग...

यानंतर पत्नीने पतीसोबत का भांडण झाले याची सविस्तर माहिती दिली. कारण ऐकताच माहेरून आलेल्या मंडळींचा पारा चढला. तिघांनीही पत्नीच्या सांगण्यावरून आरीफ याच्यासोबत भांडण करून हल्ला चढविला. त्याला लाथाबुक्कीने मारहाण करून खाली पाडले. तसेच मारहाण सुरूच ठेवली. या मारहाणीमुळे परिसरात एकच खळबळ माजली. शेख आरीफ यानी दिलेल्या तक्रारीवरून पोलिसांनी तिघांवर दुखापत केल्याप्रकरणी गुन्हा दाखल करून पुढील तपास सुरू केला आहे. 

मोडले छातीचे हाड

पती नेहमी मारहाण करीत असल्याने संतापलेल्या पत्नीने माहेरी फोन करून भावंडांना घरी बोलावून घेतले. माहेरची मंडळीही काय झाले आणि आणि काय नाही याचा विचार करीत घरी दाखल झाले. यानंतर दोघांना आमोरा-समोर बसवून भांडणाचे कारण जाणून घेण्याचा प्रयत्न केला. यावेळी जे कारण पुढे आले त्यावरून चिडलेल्या माहेरच्या मंडळींनी आरीफला मारहाण करायला सुरुवात केली. आरीफला खाली पाडून मारहाण केल्याने त्याच्या छातीचे हाड मोडल्या गेले. आरीफवर रुग्णालयात उपचार सुरू आहे. 

जाणून घ्या - Video : लॉकडाऊनमध्ये ऑन ड्युटी असलेल्या पीएसआयला मिळाले हे गोड सरप्राईज...

माहेरी फोन करून तिघांना घेतले बोलावून

कोतवाली पोलिस ठाण्याच्या हद्दीत राहणारा शेख आरीफ शेख हनिफ मंगळवारी सकाळी घरी होता. पत्नीने टीव्ही पाहण्यासाठी सुरू केला तसेच आवाज मोठा केला. आवाज मोठा केल्याने शेख आरीफ याने पत्नीला रागावले. मात्र, पत्नीने आवाज काही कमी केला नाही. त्यामुळे आरीफचा पारा चढला. त्याने पत्नीला मारहाण केली. चिडलेल्या पत्नीने माहेरी फोन करून तिघांना बोलावून घेतले. यानंतर झालेल्या भांडणातून आरीफच्या छातीचे हाड मोडले गेले.