काटोल़ (जि.नागपूर) : बापाला दारूचे व्यसन. दारू पिउन आल्यानंतर घरातील वातावरण बिघडायचे. घरातील सगळ्यांना शिवीगाळ करणे, मोठमोठ्याने भांडण करणे नित्याचेच झाले होते. रविवारी वडील असेच दारू पिऊन धिंगाणा घालू लागले.  मद्यपी बापाने आईला शिवीगाळ केल्याने राग अनावर झालेल्या मुलाने थेट कुऱ्हाडीचे घाव घालत बापाची हत्या केल्याची खळबळजनक घटना स्थानिक पोलिस ठाण्यांतर्गत येणाऱ्या येनवा येथे रविवारी रात्री घडली़.

अधिक वाचाः शिक्षकांनी ‘ऐकावे तरी कोणाचे’, करावे कुणाच्या मनाचे?

मुलाने केला वडिलांना समजविण्याचा प्रयत्न
संदीप प्रकाश बागडे व पुष्पा प्रकाश बागडे दोघेही (येनवा) अशी अटक करण्यात आलेल्या आरोपी मायलेकांची नावे आहेत. प्रकाश बागडे असे मृताचे नाव आहे. प्रकाश बागडे याला दारूचे व्यसन होते. तो नेहमी दारू पिऊन घरी भांडण करायचा. घटनेच्या दिवशी रविवारी रात्री मद्य प्राशन करून घरी आला़. पत्नीसोबत भांडायला सुरुवात केली. भांडण कशाला करता म्हणून मुलाने हटकले. प्रकाशाने पुन्हा पत्नीला व मुलाला शिवीगाळ करण्यास सुरुवात केली़. मुलाने वडिलांना समजविण्याचा प्रयत्न केला़. मात्र, वडील ऐकत नसल्याने मुलाचा राग अनावर झाला. त्याने घरातून कुऱ्हाड आणून वडिलांच्या डोक्यात मारली. यात वडिलाचा घटनास्थळीच मृत्यू झाला़.

अधिक वाचाः आरोग्यमंत्री महोदय, नाही बेड; नाही खासगीत उपचाराची क्षमता, आता तुम्हीच बघा...

घरावरून पडल्याचा बनाव
मुलाने गावातील पोलिस पाटलाचे घर गाठले. घरावरून पडल्याने वडिलांचा मृत्यू झाल्याचे सांगून त्यांना घरी बोलावले. परंतु, पोलिस पाटलांना शंका आली. त्यांनी काटोल पोलिसांना माहिती दिली़. पोलिसांनी घटनास्थळ गाठून पंचनामा केला. दोघांविरोधात गुन्हा नोंद करून अटक केली. पोलिस निरीक्षक महादेव आचरेकर यांच्या मार्गदर्शनात सहायक पोलिस निरीक्षक राहुल बोंद्रे व सहायक पोलिस निरीक्षक अश्विनी वानखेडे तपास करीत आहेत.

संपादनः विजयकुमार राऊत