गडचांदूर : मागील गुन्ह्याचा तपास करायचा आहे. त्या संबंधाने बोलावून ठाणेदाराने एकास पट्ट्याने झोडपून काढले. दरम्यान, याप्रकरणाची तक्रार अन्यायग्रस्त युवकाने जिल्हा पोलिस अधीक्षकांकडे केली आहे.

सात जून रोजी संध्याकाळी सात वाजता कोरपनाचे ठाणेदार, वाहतूक पोलिस कर्मचारी, एक महिला पोलिस कर्मचारी तांडा (धानोली) येथे आले. येथील रमेश सिंगटराव मुनावत यांच्या घरी अवैध दारू साठा असल्याच्या संशयावरून त्यांच्या घराची झाडाझडती घेतली.

तेव्हा त्यांची लहान मुलगी उपस्थित होती. त्यादरम्यान रमेश मुनावत यांचे पुतणे विपुल देविदास मुनावत यांनी घरात कुणीही नाही म्हणून सांगितले. तेव्हा ठाणेदाराने शासकीय कामात अडथळा आणू नको असे बजावले.

तपासात घरात काहीच मिळून आले नाही. तेव्हा ठाणेदारांनी मागील गुन्ह्याचा तपास आहे असे सांगून विपुल मुनावत याला ८ जूनला बोलावले. ठाण्याच्या आवारात पोहोचताच विपुल मुनावत यांनी मोबाईलमध्ये ऑडिओ रेकॉर्डिंग सुरू केली.

ठाणेदारांनी केबिनमध्ये बोलवले. तेव्हा एका शिपायाकडून पट्टा बोलवून घेतला. त्याच पट्ट्याने शिवीगाळ करीत विपुल मुनावत याला मारहाण केली. दवाखान्यात गेल्यास पुन्हा चोप देतो अशी धमकी देऊन गावाला परत पाठविले.

गावकऱ्यांनी विपुल मुनावत यांना दवाखान्यात नेले. या अनुषंगाने झालेल्या प्रकरणाची चौकशी करून ठाणेदार व पोलिस शिपायास तातडीने निलंबित करण्यात यावे अशी मागणी अन्यायग्रस्त व तक्रारदार विपुल मुनावत यांनी केली आहे. तशी तक्रार त्यांनी जिल्हा पोलिस अधीक्षकांकडे केली आहे. दरम्यान यार प्रतिक्रियेसाठी संबंधित ठाणेदोराला संपर्क केला असता संपर्क होऊ शकला नाही.