नागपूर  ः कोरोनाचा प्रादुर्भाव लक्षात घेता नागपूरमध्ये डिसेंबर महिन्यात होणारे हिवाळी अधिवेशन रद्द करण्यात यावे आणि अधिवेशनावर होणारा खर्च विदर्भातील वैद्यकीय यंत्रणा सक्षम करण्यासाठी द्यावा, अशी मागणी पश्चिम नागपूरचे काँग्रेसचे आमदार विकास ठाकरे यांनी मुख्यमंत्री उद्धव ठाकरे यांच्याकडे केली आहे.

मागील हिवाळी अधिवेशनाचा सहा दिवसांच्या खर्च ७५ कोटींच्या आसपास होता. सध्या कोरोना रुग्णांची संख्या तसेच विदर्भात असलेल्या तोकडी वैद्यकीय यंत्रणा बघता अधिवेशनाऐवजी यंदाचा सर्व खर्च वैद्यकीय सोयी-सुविधांसाठी दिल्यास अधिक योग्य होईल. एकट्या नागपूर शहराचा विचार करता दररोज सुमारे एक ते दीड हजार रुग्णांची भर पडत आहे. तसेच मृत्यूंची संख्या अठराशेच्या घरात पोचली आहे.

सविस्तर वाचा - सासऱ्याने जावयाची केली दहा लाखांची मदत; मात्र, सासरच्या त्रासाला कंटाळून मुलीने घेतला कठोर निर्णय
 

मेयो आणि मेडिकल असे दोन मोठे इस्पितळ येथे आहेत. नागपूरच नव्हे तर संपूर्ण विदर्भाचा भार या दोन्ही इस्पितळांवर पडत आहे. त्यामुळे येथील उपलब्ध मनुष्यबळ कोरोनाचा सामना करण्यासाठी अपुरे पडत आहे. सध्या करोना रुग्णांना भरती करण्यासाठी येथील खाटा अपुऱ्या पडत आहे. ऑक्सिजनचा तुटवडा जाणवत आहेत. महापालिकेकडे सुसज्ज यंत्रणा नाही. खासगी इस्पितळांमध्ये आकारली जाणारी रक्कम सर्वसामान्यांना परवडणारी नाही.

उच्च न्यायालायानेसुद्धा करोना उपचारासाठी सुविधा उपलब्ध करून देणे राज्य सरकारचे कर्तव्य असल्याचे सांगून क्रीडा संकुल येथे हजार खाटांचे इस्पितळ निर्माण करण्याचे आदेश दिले आहे. अशा परिस्थितीत अधिवेशन भरवल्यास रुग्णांची संख्या आणखी वाढण्याची शक्यता नाकारता येत नाही. 

अधिवेशन घेणे परिस्थितीशी सुसंगत नाही

आमदार निवास, रविभवन येथे कोव्हीड सेंटर स्थापन केले आहे. अधिवेशनासाठी राज्यभरातून हजारो पोलिस, अधिकारी व कर्मचारी येतात. त्यांच्या राहण्याची व खाण्याची सुविधा सरकारला करावी लागते. अशी परिस्थितीत अधिवेशन घेणे परिस्थितीशी सुसंगत नाही. त्यापेक्षा अधिवेशनावर होणार कोट्यवधींचा खर्च आरोग्य सेवा व सुविधांसाठी दिल्यास जनतेला जास्त आनंद होईल. त्यामुळे आपल्या मागणीचा गांभीर्याने विचार करावा, अशी विनंती विकास ठाकरे यांनी मुख्यमंत्र्यांना पाठविलेल्या पत्राद्वारे केली आहे. 

संपादन : अतुल मांगे