नागपूर - रामनगर परिसरातील सर्कलजवळ कारने दुचाकी स्वाराला धडक देत, पायी जाणाऱ्या महिलेला चिरडल्याने दोघांचा मृत्यू झाला. हा भीषण अपघात रविवारी सकाळी पावणे अकरा वाजताच्या सुमारास घडला. या प्रकाराने परिसरात खळबळ उडाली. राजेंद्रकुमार मातादीन चौरसिया ( वय ६२ ) यांनी दिलेल्या तक्रारीवरून पोलिसांनी कारचालकावर गुन्हा दाखल केला असून चालकाचा शोध घेत आहेत.

कुसुमाबाई ईश्वर भोयर (वय ६४, रा. संजय नगर पांढराबोडी) आणि पावस राजेद्रकुमार चौरसिया (वय ३३, रा. श्रीराधे अपार्टमेंट, हिलटॉप)अशी मृतकाची नावे आहेत. पावस युनायटेड इंडिया इन्शुरन्स कंपनीत कामाला होता.

पोलिसांनी दिलेल्या माहितीनुसार, खासगी व्यवसाय करणारे राजेंद्रकुमार चौरसिया हे आपल्या मुलासह रामनगर येथील राममंदिराच्या रस्‍त्यावरून मोपेडवर (एम.एच.४० बी.एच ३६२५) रवीनगरच्या दिशेने जात होते. त्याच्या बाजून पायी कुसुमाताई भोयर या नातेवाईकांसह जात पायी जात होत्या.

मोपेडच्या मागून कार (एम.एच. ३१ सी.पी. ५३२२) भरधाव वेगाने आली. कारने प्रथम मोपेडला जोरदार धडक दिली. त्यामुळे राजेंद्रकुमार चौरसिया हे खाली पडले आणि त्यांचा मुलगा पावस हा दुचाकीसोबत काही दूर घासत गेला. दरम्यान बाजूला असलेल्या कुसुमाताई भोयर त्यांच्या धक्क्याने खाली पडल्या. त्यांच्या अंगावरून कार त्यांना चिरडून निघाली. यामुळे त्यांचा जागी मृत्यू झाला.

पावस चौरसिया यामध्ये गंभीर जखमी झाल्याने त्यांना एका खासगी रुग्णालयात दाखल करण्यात आले. उपचारादरम्यान सायंकाळी त्यांचाही मृत्यू झाला. पोलिसांना राजेंद्रकुमार मातादीन चौरसिया यांनी दिलेल्या तक्रारीवरून विनोद म्हात्रे यांनी गुन्हा दाखल केला. वाहन चालक अद्यापही फरार असून त्याचा शोध सुरू आहे.

आरोपी चालक वकिलाचा मुलगा

रविनगर परिसरात आपल्या महागड्या कारने महिलेला चिरडत मोपेडला धडक देणारा २४ ते २५ वर्षीय युवक नागपुरातील एका मोठ्या वकिलाचा मुलगा असल्याची माहिती आहे. पोलिसांनी त्याचा शोध घेतला असता, तोही अपघातात जखमी झाला असून त्याचावर उपचार सुरू असल्याची माहिती सूत्रांनी दिली. सोमवारी त्याला पोलिस ताब्यात घेण्याची शक्यता आहे. दरम्यान अपघात इतका भीषण होता की, परिसरात महिलेच्या रक्ताचा सडा पडल्याचे दिसून आले.