नागपूर : तालुक्यातील बिडगाव जटामखोरा वळणावर समोरून येत असलेल्या चारचाकीने दुचाकीला धडक दिल्याने एका चार वर्षीय बालकाचा जागीच मृत्यू झाला. आई पुनम कैलास कुमरे या गंभीर जखमी झाल्यात, तर मामा परमेश्वर इवनाती किरकोळ जखमी झाला.

मिळालेल्या माहितीनुसार, बहिणभाऊ आणि भाचा हे तिघेही बिडगाववरून केलवद येथे दुचाकीने बाजाराला आले.

बाजार करून परत जात असताना जटामखोरा वळणावर समोरून येत असलेल्या चारचाकीने दुचाकीला जोरदार धडक दिल्याने गगन कुमरे (वय४)हा जोरात आदळल्याने त्याची मान तुटली व जागीच मरण पावला.

गगनची आई पुनम कुमरे हिच्या डोक्याला जबर मार लागला, तर मामा परमेश्वर इवानाती हा जखमी झाला. घटनेची माहिती रायबासा जटामखोराचे उपसरपंच सोनू रावसाहेब तसेच सदस्य दीपक ढोबळे यांना मिळतात त्यांनी घटनास्थळ गाठून सर्व जखमींना गाडीमध्ये टाकून सावनेर येथील शासकीय दवाखान्यात दाखल केले. चिमुकल्या गगनची मान तुटल्याने डॉक्टरांनी त्याला मृत घोषित केले. गगनच्या आईला डोक्याला जबर मार लागल्याने तिला नागपूर येथील मेडिकल येथे रवाना केले. पुढील तपास केळवद पोलिस करीत आहेत.