नागपूर : नागपूर परिक्षेत्राच्या विशेष पोलिस महानिरीक्षकपदी औरंगाबादचे पोलिस आयुक्त चिरंजीव प्रसाद यांची नियुक्ती करण्यात आली आहे तर, नागपूर परिक्षेत्राचे विशेष पोलिस महानिरीक्षक के.एम.एम. प्रसन्ना हे आता औरंगाबाद क्षेत्राचे विशेष पोलिस महानिरीक्षक असणार आहेत. यासंबंधीचा आदेश गृहमंत्रालयातर्फे आज जारी करण्यात आला.

केंद्रीय प्रतिनियुक्तीवरून परत आल्याने प्रतीक्षाधीन असलेले निखिल गुप्ता यांची बदली औरंगाबादच्या पोलिस आयुक्तपदी करण्यात आली आहे. औरंगाबाद परिक्षेत्राचे विशेष पोलिस महानिरीक्षक रवींद्र कुमार यांना सध्याचे अपर पोलिस महासंचालक श्रेणीतील पद विशेष पोलिस महानिरीक्षक श्रेणीमध्ये अवनत करून नियंत्रक वैद्यमापन शास्त्र, महाराष्ट्र राज्य मुंबई येथे पाठवण्यात आले आहे.

सविस्तर वाचा -  डॉ. उपाध्याय यांची मुंबईला बदली, उपराजधानीला मिळाले नवे आयुक्त

भारतीय पोलिस सेवेतील विशेष पोलिस महानिरीक्षक श्रेणीतील अधिकाऱ्यांच्या बदल्या आज करण्यात आल्या आहेत. महाराष्ट्र पोलिस अधिनियम मधील कलम २२ (न) च्या तरतुदीनुसार भारतीय पोलिस सेवेतील अधिकाऱ्यांच्या बदल्या उपरोक्तप्रमाणे करण्यात आलेल्या आहेत. सोबत पोलिस महासंचालकांनी कायदा व सुव्यवस्थेची परिस्थिती विचारात घेऊन, उपरोक्त अधिकाऱ्यांना बदलीच्या ठिकाणी हजर होण्याकरिता कार्यमुक्त करावे, अशा सूचनाही गृहमंत्रालयाकडून देण्यात आल्या आहेत.

संपादन - स्वाती हुद्दार