नागपूर  : उन्हाळा सुरू झाला की घराघरांत कुलर लागतात. कुलर बाजारातही खरेदीदारांची गर्दी उसळते. मात्र, कोरोनामुळे यंदा कुलर मार्केट ठप्प आहे. त्यामुळे कुलरविक्रेत्यांचे लाखो रुपयांचे नुकसान होत असून, कुलरअभावी सर्वसामान्य नागरिकांनाही फटका बसत आहे.
दरवर्षी मार्च महिन्यापासून बाजारात कुलर विक्रीस सुरुवात होते. बाजारपेठांमध्ये कोट्यवधींची उलाढाल होते. मात्र, कोरोनाच्या उद्रेकानंतर जमावबंदी टाळण्यासाठी सरकारने अचानक "लॉकडाऊन' केले. तेव्हापासून शहरातील सर्व मार्केट बंद आहेत. अनेक दुकानदार आपली दुकाने बंद करून घरी आहेत. व्यवसाय ठप्प असल्याने त्यांना मोठे आर्थिक नुकसान सोसावे लागत आहे. कोरोनाने त्यांचे उदरनिर्वाहाचे साधनच हिरावून घेतले. परिणामत: अनेकांवर उपासमारीची वेळ आली आहे. कोरोनाचा वाढता प्रादुर्भाव लक्षात घेता "लॉकडाऊन' आणखी काही दिवस वाढले आहे. त्यामुळे दिवसेंदिवस त्यांची चिंता वाढत आहे. यंदा पावसाळा लांबल्याने उन्हाळा थोडा उशिराच सुरू झाला. मात्र, गेल्या काही दिवसांपासून तापमानासोबतच उकाडाही वाढू लागल्याने आता कुलरची गरज भासत आहे. परंतु, विक्री व दुरुस्तीची दुकानेच बंद असल्याने अनेकांना सध्या कुलरविना दिवस काढावे लागत आहेत. ज्यांच्याकडे कुलर आहेत, त्यांनी सुरू केले. मात्र, अनेकांकडील कुलर व पंखे नादुरुस्त असल्याने त्यांची अडचण आहे.

सविस्तर वाचा -  चिमुकल्याच्या कडक सँल्यूटने जिंकले मन

उपासमारीची वेळ
कोरोनाच्या फैलावानंतर सरकारने 22 मार्चला "लॉकडाउन' घोषित केले. तेव्हापासून दुकाने बंद आहेत. कुलरविक्रीवर आमचा उदरनिर्वाह सुरू असतो. मात्र, सध्या व्यवसाय ठप्प असल्याने उपासमारीची वेळ आली आहे. माझ्यासह सारेच कुलरविक्रेते चिंतित आहेत.
ललित डंभारे, कुलरविक्रेते