नागपूर : थैमान घालणाऱ्या जीवघेण्या कोरोना विषाणूचा प्रादुर्भाव उपराजधानीत दिवसेंदिवस वाढत आहे. सतरंजीपुरा आणि मोमिनपुरा या कोरोनाच्या हॉटस्पॉटमधील रुग्ण मोठ्या प्रमाणात बरे होत आहेत. मात्र, शहरातील इतर वस्त्यांमध्ये कोरोनाबाधित आढळून येत असल्याने प्रशासनासमोर नवा पेच निर्माण झाला आहे. मंगळवारी (ता.30) मध्यवर्ती कारागृहातील 9 कर्मचाऱ्यांसह 32 जणांचे अहवाल कोरोनाबाधित आढळून आले. यामुळे शहरातील कोरोनाबाधितांची संख्या 1505 वर पोहोचली आहे. 

शहरातील रस्त्यावर तैनात असलेले पोलिस हटवण्यात आल्यामुळे नागरिकांची गर्दी सर्वत्र दिसून येत आहे. विलगीकरणातील संख्या कमी होत आहे. परंतु, कोरोनाचे संकट अधिक गडद होत आहे. मेडिकलमध्ये तपासण्यात आलेल्या नमुन्यातून मध्यवर्ती कारागृहातील 9 कर्मचारी कोरोनाबाधित असल्याचे उघड होताच येथे खळबळ उडाली. कारागृहात एकूण 10 जण कोरोनाबाधित आढळले. कारागृह कोरोनाचे हॉटस्पॉट ठरण्याची शक्‍यता वर्तविण्यात आली. याशिवाय पांडे लेआउट यशोधरानगर येथील दोघे बाधित आढळून आले. 

मेयोतील नमुने तपासणीतून आणखी 8 जण मिलिटरी हॉस्पिटलमधून बाधित आले आहेत. याशिवाय 5 जण मोमिनपुऱ्यातील आणि एक जण मिनिमातानगर येथील असल्याचे उघड झाले. मोमिनपुऱ्यातील 5 जण आणखी बाधित आल्याने या परिसरात पुन्हा भीतीचे वातावरण निर्माण झाले आहे. सायंकाळी मेयोतील नमुन्यात झिंगाबाई टाकळी, टिमकीसह एक जण रामटेकच्या गडावर कोरोनाबाधित असल्याचा अहवाल प्राप्त झाला. याशिवाय एम्सच्या प्रयोगशाळेतून नरखेड येथील एक जण बाधित आढळले. 

क्लिक करा - तेरी बहन बहोत माल दिखती हैं', हे ऐकताच तो संतापला आणि... 
 

नागपुरातील पाच प्रयोगशाळेतून मंगळवारी तपासण्यात आलेल्या तीनशेवर नमुन्यातून 32 जण बाधित आढळून आले. शहरात 5 मार्चपासून कोरोना संशयितांचे नमुने तपासणीचे काम मेयो रुग्णालयात सुरू झाले. यानंतर मेडिकल, एम्स, माफसु आणि नीरी या ठिकाणी प्रयोगशाळा सुरू करण्यात आल्या. आतापर्यंत या सर्व प्रयोगशाळेतून सुमारे 25 हजार चाचण्यांचा विक्रम पूर्ण होत आहे. 

गर्भवतीच्या डोळ्यात आनंदाश्रू 

21 जून रोजी वर्धमाननगरातील गर्भवती महिला हॉटेल सेंटर पॉइंट येथील विलगीकरण केंद्रात होती. कोरोनाबाधित आढळल्यानंतर मेडिकलमध्ये दाखल झाली. गर्भात बाळ असल्याने ती घाबरली. परंतु, मेडिकलमधील डॉक्‍टरांनी समजूत काढली. योग्य उपचार केले. आज 5 महिन्यांच्या गर्भवती मातेने कोरोनावर मात केली. मंगळवारी तिला सुटी दिली, मात्र घरी जाताना, पोटातील बाळ सुरक्षित असल्याची विचारणा केली. त्यावेळी बाळ एकदम सुरक्षित असल्याचे डॉक्‍टरांनी सांगताच त्या कोरोनामुक्त गर्भवती मातेच्या डोळ्यातून आनंदाश्रू बाहेर आहे. मंगळवारी शहरात एकूण 42 जण कोरोनामुक्त झाले. मेडिकलचे 41, मेयोतील 7, एम्सच्या 10 जणांचा समावेश आहे. त्यामुळे आजपर्यंत शहरात कोरोनामुक्त झालेल्यांची संख्या एकूण 1223 वर पोहोचली आहे. 
 

प्लाझ्मा स्वीकारण्यास कोरोनाबाधिताचा नकार 

मुख्यमंत्री उद्धव ठाकरे यांच्या हस्ते मुंबईत राज्यभरातील प्लाझ्मा उपचार सुविधा केंद्राचे उद्‌घाटन झाल्यानंतर दुसऱ्याच दिवशी प्लाझ्मा थेरेपीच्या उपचाराला उपराजधानीतील मेडिकलमध्ये सुरवात होणार होती. रुग्णाची निवडही करण्यात आली. मात्र, या प्रकल्पाचे नेतृत्व करणाऱ्या मेडिकलमध्ये पहिल्या रुग्णाला प्लाझ्मा देण्याचा प्रयोग फसला. मंगळवारी पहिल्या रुग्णाला कोरोनामुक्त झालेल्या व्यक्तीकडून दान मिळालेला प्लाझ्मा देण्यात येणार होता. मात्र, मेडिकलच्या कोविड हॉस्पिटलमध्ये दाखल असलेल्या त्या उच्चविद्याविभूषित कोरोनाबाधिताने दात्याकडून मिळालेला "प्लाझ्मा' स्वीकारण्यास नकार दिला. कोरोनाबाधित डॉक्‍टरनेच यूटर्न घेतल्याने मेडिकलमध्ये प्लाझ्माचा प्रयोग आजच्यापुरता तरी थांबला आहे. मेडिकलमधील प्लाझ्मा थेरपी मात्र सज्ज आहे. रुग्णांकडून परवानगी मिळताच प्लाझ्माचा प्रयोग करण्यात येईल. 
 

• कारागृहातील 10 जण कोरोनाबाधित 
• रामटेकच्या गडावर आणखी एक बाधित 
•  साडेतीन महिन्यांत 24 हजार 500 चाचण्या 
• नरखेड आले कोरोनाच्या नकाशावर