नागपूर : शाळेत शिकविणाऱ्या ३५ वर्षीय गणित शिक्षकाने शाळेतीलच सहावीत शिकणाऱ्या १२ वर्षीय मुलीवर प्रयोगशाळेत अत्याचार केला. ही धक्कादायक घटना सोमवारी (ता.१०) सकाळी १० वाजताच्या सुमारास उघडकीस आली. याप्रकरणी सक्करदरा पोलिसांनी आरोपी शिक्षकाला अटक केली आहे.

संजय विठ्ठल पांडे (वय ३५, रा. कामगारनगर) असे आरोपी शिक्षकाचे नाव आहे. पोलिसांनी दिलेल्या माहितीनुसार, सक्करदरा परिसरात असलेल्या एका शाळेत गणित शिक्षक म्हणून संजय पांडे कार्यरत आहे.

गेल्या तीन महिन्यांपासून तो सातत्याने शाळेत सहाव्या वर्गात शिकणाऱ्या १२ वर्षीय मुलीवर अत्याचार करीत होता. त्यामुळे मुलगी सातत्याने घरी आईकडे पोटदुखीची तक्रार करायची. दरम्यान ५ एप्रिलला पांडे याने शेवटला पेपर संपल्यावर मुलीला विज्ञान प्रयोगशाळेत नेऊन अत्याचार केला. त्यानंतर मुलगी घरी आली असता,

आईकडे पोटदुखीची तक्रार केली. यावेळी तिच्या आईने तिला विश्‍वासात घेऊन विचारणा केली असता, तिने सर्व हकीकत सांगितली. त्यामुळे घटनेचा खुलासा झाला. पालकांनी याविरोधात सक्करदरा पोलिसांकडे धाव घेतली. पोलिसांनी त्याच्यावर पोक्सो कायद्यांतर्गत गुन्हा दाखल करीत अटक केली. त्याला न्यायालयाने त्याची १५ तारखेपर्यंत पोलिस कोठडीत रवानगी केली आहे. दरम्यान शाळा प्रशासनाकडून त्याचा निलंबनाची कारवाई अपेक्षित आहे.

लग्न करण्याचे आमिष आणि धमकीही

१२ वर्षीय मुलीवर सातत्याने अत्याचार करीत असताना शिक्षकाने तिला तुझ्यासोबत लग्न करेल असेही आमिष दिले होते. वेळोवेळी तिला प्रयोगशाळेत नेऊन अत्याचार केल्याची माहिती समोर आली आहे. विशेष म्हणजे, याबाबत कुणालाही सांगितल्यास जीवे मारण्याचीही धमकी शिक्षकाने पीडित मुलीला दिली होती.