नागपूर : रेल्वेतून प्रवास करणाऱ्या अथवा स्थानकावर दिसणाऱ्या मुलांचे अपहरण होऊ नये म्हणून रेल्वे सुरक्षा बल (आरपीएफ) सतर्क झाली आहे. संशयास्पद हालचाली दिसताच आरपीएफ जवान त्वरित चौकशी करीत आहे.

मानवी तस्करी करणारे रेल्वेचा आधार घेत असल्याचे विविध घटनांतून उघडकीस आले आहे. अनेक कारणांनी घरून पळालेली मुले मानवी तस्करीत अडकतात. पुढे त्यांचे आयुष्य उद्‍ध्वस्त होते. असामाजिक तत्त्वाचे लोक असा मुलांना हेरतात. बेपत्ता झालेली मुले त्यांच्या पालकांना सुखरूप मिळावी, यासाठी रेल्वे सुरक्षा बलाचे जवान प्रवासात तसेच स्थानकावर विशेष लक्ष ठेवून असतात. मुलांच्या बाबतीत कुठेही संशयास्पद हालचाली आढळल्यास ते चौकशी करतात.

अपहरणकर्त्यांच्या व मानवी तस्करी करणाऱ्यांच्या तावडीतून रेल्वे सुरक्षा बलाच्या जवानांनी बहुतांश मुलांना वाचविले आहे. आरपीएफने मागील वर्षी नागपूर विभागातून १५६ मुलांची सुटका केली. यात अपहरण झालेल्या १३ मुलांचा समावेश आहे.