नागपूर : वर्धा मार्गावर बसमध्ये महिलांच्या पर्समधील दागिने चोरी करणाऱ्या टोळीतील एका महिलेला साथीदारासह पकडण्यात बेलतरोडी पोलिसांना यश आले आहे. टोळीतील ३ महिला फरार असून पोलिस त्यांचा शोध घेत आहेत. ललिता भारत बलवीर (५०) रा. कुंजीलालपेठ आणि नितीन पांडुरंग मेश्राम (४८) रा. कुकडे लेआऊट अशी अटकेतील आरोपींची नावे आहेत.

बसमध्ये प्रवासादरम्यान महिलांच्या पर्समधील दागिने व इतर महागड्या वस्तू व रोकड चोरी करणारी ही टोळी अनेक दिवसांपासून शहरात सक्रिय आहे. गत २१ जानेवारीला सायंकाळी ज्योत्सना जीवन लोंडे (वय ५० रा. वणी, यवतमाळ) ही महिला वर्धा मार्गावरील चिंचभवन येथून यवतमाळला जाण्यासाठी बसमध्ये बसल्या. प्रवासादरम्यान डोंगरगाव पूर्वीच ४ महिलांनी ज्योत्सनाच्या बॅगमधील ३ तोळ्याचे मंगळसूत्र चोरी केले. ज्योत्सनाच्या तक्रारीवरून पोलिसांनी गुन्हा नोंदवत तपास सुरू केला. सीसीटीव्ही कॅमेऱ्यांची फुटेज तपासण्यात आले. मात्र, सर्व महिलांच्या तोंडाला स्कार्फ बांधून असल्याने त्यांची ओळख पटविणे कठिण होते. त्यामुळे पोलिसांनी खबऱ्यांना कामावर लावले. त्यातून महिलांच्या टोळी बाबत माहिती मिळाली. पोलिसांनी ललिताला अटक केली, मात्र, इतर तिघी फरार होण्यात यशस्वी झाल्या.

कारने करायच्या ये­-जा

ललिताच्या चौकशीत समोर आले की, नितीन मेश्राम सर्व महिलांना आपल्या कारने ने-आण करीत होता. तो वेगवेगळ्या बस थांब्यावर महिलांना उतरवतो. चोरी केल्यानंतर महिला बसमधून उतरायच्या आणि नितीन त्यांना घेण्यासाठी तेथे पोहोचत होता. चोरीचा माल विकण्याची जबाबदारीही नितीनला देण्यात आली होती. फरार महिलांवर चोरीचे अनेक गुन्हे दाखल आहेत. पोलिसांनी ललिताकडून ७५ हजार रुपये किंमतीचे मंगळसूत्र जप्त केले आहे.