नागपूर : अजनी परिसरात राहणाऱ्या १७ वर्षीय मुलीला गुंडाने प्रेमपाशात अडकविले. लग्नाचे आमिष दाखवून तिचे शारीरिक शोषण केले. पीडितेला गर्भधारणा झाली आणि घटना उघडकीस आली. याप्रकरणी अजनी पोलिसांनी आरोपीविरुद्ध गुन्हा नोंदविला. विक्रांत शिवाजी गौरकर (२३) रा. प्रेमनगर असे आरोपीचे नाव आहे. विक्रांत सराईत गुन्हेगार असून, त्याच्यावर अनेक गुन्ह्यांची नोंद आहे.

पीडित मुलगी दहावीची विद्यार्थिनी आहे. जवळपास सात महिन्यांपूर्वी तिची विक्रांतशी मैत्री झाली. विक्रांतने तिला जाळ्यात अडकविले. दोघांच्या भेटीगाठी होऊ लागल्या. ऑगस्ट महिन्यात विक्रांतने तिला लग्नाचे आमिष दाखवून शारीरिक संबंध प्रस्थापित केले. त्यानंतर तो सतत तिचे शोषण करायचा. दरम्यान पीडितेला गर्भधारणा झाली. पीडितेने कुटुंबीयांपासून ही बाब लपवून ठेवली होती. काही दिवसांपूर्वी अचानक तिची प्रकृती बिघडली. कुटुंबीय तिला घेऊन उपचारार्थ डॉक्टरकडे घेऊन गेले असता ती गर्भवती असल्याचे समोर आले. बदनामीच्या भीतीने कुटुंबीय तिला गर्भपातासाठी बजाजनगर परिसरातील एका खासगी रुग्णालयात घेऊन गेले. मात्र, पीडिता अल्पवयीन असल्यामुळे रुग्णालय प्रशासनाने घटनेची माहिती बजाजनगर पोलिसांना दिली. बजाजनगर पोलिसांनी लैंगिक अत्याचाराचा गुन्हा नोंद केला. मात्र, घटना अजनी हद्दीतील असल्याने प्रकरण अजनी पोलिसांकडे सोपविण्यात आले. आता अजनी पोलिस घटनेचा तपास करीत आहेत. विक्रांतवर गंभीर गुन्ह्यांची नोंद आहे.