नागपूर : घरावरील मालकी हक्काच्या वादातून दोन बहिणीत झालेल्या झटापटीत मोठ्या बहिणीला फरशीवर ढकलले. त्यामुळे तिच्या डोक्याला गंभीर दुखापत झाल्याने तिचा मृत्यू झाला. या प्रकरणी बहिणीच्या मृत्यूस कारणीभूत झाल्याचा गुन्हा अजनी पोलिसांनी दाखल केला. जयशीला सुरेंद्र गणवीर (५०, रा. जोशीवाडी, कुकडे ले आऊट) असे गुन्हा दाखल करण्यात आलेल्या लहान बहिणीचे नाव आहे.जोशीवाडी येथे थॉमस नावाचे दाम्पत्य राहत होते. त्यांना मुलेबाळे नव्हती. त्यामुळे जयशीला ही त्यांची काळजीवाहक म्हणून त्यांच्याकडे कामाला होती. (dispute between two sisters over a home ownership)

काही दिवसांपूर्वी थॉमस यांचे निधन झाले. त्यानंतर त्यांच्या पत्नीची ती काळजी घेत होती. दरम्यान, जयशीलाची परिचारिका असलेली मोठी बहीण धर्मशीला बाळचंद डहाट (५४) ही आपल्या कुटुंबियांसह थॉमस यांच्या घरी वरच्या मजल्यावर राहायला आली.त्यानंतर थॉमस यांच्या पत्नीचे देखील निधन झाले. त्यानंतर जयशीलाने घरावर मालकी सांगून धर्मशीला हिला घर रिकामे करण्यास सांगितले होते. त्यावरून त्यांच्यात वाद सुरू होता. १८ डिसेंबर रोजी दुपारी १२ च्या सुमारास दोघ्याही बहिणीमध्ये वाद झाला असता त्यांच्यात झटापट झाली. या झटापटीत जयशीलाने धर्मशीलाला फरशीवर ढकलले. त्यात धर्मशीलाच्या डोक्याला फरशीचा मार लागून घटनास्थळीच तिचा मृत्यू झाला. याप्रक़रणी अजनी पोलिसांनी जयशीलावर ३०४ अन्वये गुन्हा दाखल केला.