नागपूर : कोरोनासारख्या कठीण प्रसंगाकडे महापालिकेचे आयुक्त तुकाराम मुंढे यांचा बघण्याचा दृष्टिकोन सकारात्मक असल्यानेच, या कोरोना आणिबाणीच्या प्रसंगातून मार्ग काढत त्यांनी लॉकडाऊनच्या काळात आरोग्यसेवेचा कायापालट केला. संकटाकाळात संधीचे सोने केले. 12 कोटींचा खर्च करण्यात आला. मात्र, सद्या महापालिकेची आरोग्यसेवा संपूर्णपणे सक्षम नसल्याने मेडिकल, मेयोसह एम्सवरच भार आहे. यामुळे शहरातील महापालिकेच्या रुग्णालयांना कोविड केअर सेंटर म्हणून वापरात आणावे आणि हळूहळू उपचार यंत्रणा सक्षम करावी, असा सूर वैद्यकीय वर्तुळात आहे. 

विशेष असे की, 50 दिवसांत खासगी रुग्णालयांना लाजवेल, असे या रुग्णालयांचे रूप पालटले आहे. याचे सर्व श्रेय मुंढे यांना जाते. गांधीनगर येथील इंदिरा गांधी रुग्णालय, इमामवाडा येथील आयसोलेशन हॉस्पिटल, पाचपावली स्त्री रुग्णालय पाचपावली या तीन रुग्णालयांचा पूर्णतः कायापालट झालेला आहे. के.टी. नगर रुग्णालय आणि आयुष हॉस्पिटल, सदर ही दोन रुग्णालये नव्याने तयार करण्यात आली आहेत. या पाचही रुग्णालयात एकूण 450 खाटा आहेत. रुग्णालयात अत्याधुनिक आरोग्य सुविधा उपलब्ध करून देण्यात आल्या आहेत. प्रत्येक बेडला सेंट्रल ऑक्‍सिजन आणि सेंट्रल सक्‍शनची सोय आहे. 

क्लिक करा - बापाने नऊ महिन्यांच्या चिमुकलीला ठार मारण्यापूर्वी पाजले होते विष, पोलिस तपासात सत्य आले पुढे...
 

कळमेश्‍वर मार्गावरील सेंटर तयार 

भविष्यातील कोरोना संकटाचा वेध घेऊन कळमेश्वर मार्गावरील 5 हजार खाटांचे कोविड केअर सेंटर तयार झाले. मात्र, येथे वीज फिटिंगसह सांडपाणी वाहिनीशी संबंधित कामे सुरू असल्याने ते तूर्तात सुरू करता येत नाही. यामुळे शहरातील सदरमधील शासकीय तंत्रशिक्षण महाविद्यालय आणि मिहानमधील शासकीय अभियांत्रिकी महाविद्यालयात कोविड केअर सेंटर तयार करण्यात येत आहेत. येथे अतिरिक्त खर्च करण्यापेक्षा महापालिकेच्या रुग्णालयांत कोविड केअर सेंटर तयार करून ते वापरात आणता येतात. यामुळे मेडिकल, मेयो तसेच एम्समध्ये रुग्ण वाढत असल्याने महापालिकेच्या रुग्णालयांतही बाधितांना ठेवल्यास सोयीचे होईल. 

800 रुग्ण ग्रामीण भागातील 

सध्या नागपूर जिल्ह्यातील रुग्णांचा आकडा साडेतीन हजारांच्या जवळ पोहचला आहे. यातील 800 रुग्ण हे नागपूरच्या ग्रामीण भागातील आहेत. ग्रामीण भागातील आरोग्य यंत्रणा सक्षम नसल्याने त्यांचाही भार मेयो, मेडिकल आणि एम्सवरच येईल. ही बाब लक्षात घेता महापालिकेच्या रुग्णालयांना कोविड केअर सेंटर सुरू करून हळूहळू येथे उपचार यंत्रणा सक्षम करता येईल, अशी चर्चा वैद्यकीय वर्तुळात आहे. 

अतिदक्षता विभाग ही ऐतिहासिक घटनाच.. 

शहरातील पाच रुग्णालयांत 450 खाटा तयार केल्या. यापैकी इंदिरा गांधी रुग्णालय, पाचपावली स्त्री रुग्णालय आणि के.टी. नगर हॉस्पिटलमध्ये 50 खाटांचा अतिदक्षता विभाग तयार करण्यात आला आहे. ही महापालिकेच्या मागील पन्नास वर्षाच्या काळातील ऐतिहासिक घटना म्हणता येईल. आता केवळ तज्ज्ञ डॉक्‍टर, परिचारिका आणि पॅरामेडिकल कर्मचारी असे मनुष्यबळ उपलब्ध करावे अशीही चर्चा वैद्यकीय वर्तुळात आहे. 

संपादित : अतुल मांगे